KI 75 SNEM KI JINGSHAH LEHBEIN HAPDENG KA JINGLAITLUID

(Da u. Chandame Sungoh
           Chutwakhu Jowai)

 Para ri baieit ki khun ka Bri U Hynñiewtrep Hynñiewskum , Khynriam U Pnar U Bhoi U War u paid Khasi ba īar. Lehse ngi lah ban sngewbit sngewbiang sngewroi sngewpar , sngew nang sngew stad sngew  suk sngew shngaiñ, hynrei haka jingpeit jing īoh-i jong nga te em kam long rea kumta. Ngi dang long kiba duk ngi dang long kiba sahdien, ngi dang long kiba sahdien haka jingnang jingstad haka pule puthi hakhmat kiwei pat ki jait bynriew, ngi dang long kiba rit paid tang shitroh ha khmat ka pyrthei ba īar.
 Naduh ba ngi la ïoh īalaka jong ka ri haka 15 tarik August 1947 ngi la long laitluid hala ki jong ki ri ki hima ha kylleng ki bynta jong ka ri India. Ka ri Khasi Jaintia jong ngi ruh ka long kumjuh, ka sorkar phareng ha shwa ba kan ieh noh ïa ngi kala pynbna kum ki syiem bad ki hima kiba laitluid, kane ka mut ngi lah ban pynīasoh bad kino kino ki ri lane ban thaw ia ka ri lajong. 
  Hynrei haka 15 December  1947 ki nongīalam jong ki 25 tylli ki hima Khasi kila  īasoi iaka kata ka dulir haka kyrteng jong ka Federation of Khasi States kaba ngi tip kum ka Instrument of Accession (IOA)  bad ka Indian Dominion te lyngba kane ka dulir ngi la long nong India noh.  Kat kum ka jingiasoi haka ta ka dulir te ngi dei ban long State lypa noh hi namarba la īasoi lypa haka kyrteng Khasi States bad la dei ban pynbna State ba pura ïa ngi naduh ka Republic Day ba nyngkong duh haka 26 January 1950. Pynban mar khong pong la niewbeiñ niewpoh  bad la pynhiar kyrdan ïa ngi tang kum ka District hapoh ka jylla Assam. 
  Kane ka dei ka jingshah lehbeiñ ba nyngkong eh jong ngi. 
   Hadien nangta haba ki riew rangbah jong ngi kila pei mat bangi la shah shet kylla haka sorkar Bharat te ki la ieng ialeh ban ïoh iala ka jong ka jylla, bad hadien 25 snem jong ka jingīaleh ka sorkar India kala ai ïa ngi da kata ka State kaba khlem u pud u sam haka 21 January 1972. Nalor ba ngim don īa u pud u sam u ba pura, ngi dang hap haduh mynta mynne hapoh kata ka Assam Schedule, ka Join Cadre bad ka Status Quo. Ha kaba lyngba jong kine ka sorkar Assam kala ïoh ban thombor ban lehbor bad ban sngew halor ban ïangi. 
  Kane ka dei ka bynta ba ar jong ka jingshah lehbeiñ. Naka por shaka por ki pait nongshong shnong kiba don ha ki thaiñ khappud ki ud ki nam shaka sorkar ban pynbeit iaka ne ka jingeh , hooid ka sorkar Meghalaya ruh kala buddien bad leh īakane hynrei ki sah kut tang ha ki jing iakren katba ka kam pat kam shym urlong satia . 
     Haba ngi peit shaka synshar khadar, ka don ka jingleh shiliang khmat kaba shyrkhei ka jingbam sap kaba jur. Ngim lah ban len hapoh kine ki 75 snem kiba la leit  kiba bit ba biang te kila bit la biang shisha, kiba riewspah te kila riewspah shisha, kiba kiew te kila kiew shisha. Hynrei haba ngi ong ka ri bad ka jaitbynriew te kam mut tang  īakine, ka kynthup lang īa baroh ki kup shiliang sem shiliang, ki duk ki raitoi ki bieij ki anna. Tang ba la bit la biang ki wei ki ar kammut ba la bit la biang ka ri bad ka jaitbynriew. 
 La sngewthait bad sngewjlep ban sngap ïaki  jingkren jong ki Ministers  ha ki sngi Independent bad sngi Republic, ade sngew haki jingkren jong ki ha kine ki sngi te sngew la kumba la bit la biang lut nadong shadong. Hato ym long seh ban kdew khyndiat khynsoit ïa ki  jingduna ruh? Lada ngi peit ïa ka PHE Department, ka tnad sam umbam umdih, haduh katno eh ki thaiñ nongkyndong kiba la īoh umbam umdih. Ka jingpyntrei kam ïaki Project Supply umbam umdih ki long kiba sahteng. Ka jingpyntrei kam ïaka Jal Jeevan Mission kalong tang kumba 36 - 40 percent ei ei  kaba sah nangne pat tip kan poi shano bad kan long kumno? 
 Ka Tnad pynmih  bording ruh kadon haka kynrum kynram. Ka jinglip light khah khah, ka load shedding kaba man ka por, ka jingsah ram  kaba daki spah klur tyngka  nalor kane ka sorkar kam lehraiñ wat ban thmu  die ïa ka sha ki riew shimet ruh. 
  Ka Education Department. Ka tnad pule puthi ruh hakaba ki nonghikai ki hap ban īakhih ban shah thngan ban īathiah surok ban dawa iala ka bainong. Ki skul sorkar kim juh poi shakhmat ha ki result eksamin, khamtam lei sha ki thaiñ nongkyndong ki skul sotkar dei kiba torti bad ki bymler da shisha. 
  Ka Health Department. Ngi ïoh khubor jan man ki bnai baki myntri sorkar ki plie lane pynkiew kyrdan ïaki Sub- Center,  PHC, CHC,  Civil Hospitals, hynrei bun ba ki tang shu khap ribon. Ki jingthiah, ki tiar sumar, ki nurses, ki Doctors ki dawai dashin ki neh sah kumjuh lane ki dang hiar pynban. Jan baroh ki Department ruh ki long kumne. 
  Kidon ki skim rep khaw hynrei lymda don khaw dkhar te ngin īap thngan. Ki don ki skim ri syiar ri sniang ri dohkha hynrei lymda don ki syiar ki sniang ki dohkha na ri dkhar te ngim ïoh mad doh hi. Ki Ministers ki heh ki haiñ ki leh pylleiñ pylleiñ ïaki kam be-aiñ naka bynta ka jingmyntoi jong ki shimet. Haka por ka jingiakhih ki nong East Jaiñtia sha phang ki Coke Factory katno ngut ki ministers kiba paw kyrteng. Katno ngut ki hehspah ki MDC ki Waheh Chnong. ba long Local Directors ha ki Cement Plants ha East Jaiñtia ban īoh kamai spah  dakaba pynjot iaki khlaw ki btap ki dieng ki siej ka sawdong sawkun bad ka mariang. Man ka miet ki trok kit dewīong be- aiñ ki īaid sahuh lyngba ki High Level ki Agent jong ka sorkar. Daki spah tylli ki Sawmills be-aiñ tang hapoh West Jaiñtia kiba long ruh jong ki MLA / MDC hato ka Forest Department ka leh aīu halor kane !.
   Kine kidei ki jingshah lehbeiñ jong ngi ki rit ki ria ki kup shiliang sem shiliang ki bieij ki anna hapoh ki 75 tylli ki snem jong ka jinglaitluid.