[Da u, Chandame Sungoh
Chairman
Hynñiewtrep Border Disputed Redressal Forum] –
Naduh hyndai hynthai kulong kumah mynba danglung ka sngi u bnai na ki por bympat don ki jingthoh jingtar lyngba ka jingiathuhkhana pateng ki riewtymmen kiba shongnia bad shong nongrim la ong badei ki Khasi Pnar kiba shong basah nyngkong ha ka thaiñ Labang Nangphyllut & Pangam Raliang.
Ia kane lah ban pynshisha da kiba bun ki sakhi satar. Kawei na kine kadei ka kyrteng jong ki lum ki wah, ki jaka puta bad ki shnong ki thaw. Namarba wat ki shnong kiba shong basah da ki Karbi ruh bun kiba jer da ka ktien Pnar suda Kumba ngi tip kum ka Umkhyrmi, Moothade, Mookoilum, Jrikyndeng, Samatan, Myn-i, Lakaroi, Tahpat, Umbaso, Mooiong, Impu, Umchara, Moolahin, Umpawiang bad kiwei kiwei de. Kiwah kum kawah Myn-i Mynriang, Umpu, Umchara, Umpawiang, Umrani, Umtruiñ, Unnam, Amlong. Bad saw tylli kiwah kiba don hapoh jong ka sor Hamren kaba dei ka nongbah jong ka West Karbi Anglong Distict ka Umbinong, Umryntih, Umnam, Umteli kidei kiba jer daka ktien Pnar. Ki lum kum u Lumlama, Lumduria, Sarynthu, Raksiah, Chahlyer, Pampyrthad, Iatalong kidei kiba jer daka ktien Pnar.
Naduh bala shem nyngkong ïa ka Hima Jaiñtia ha ka jingsynshar u Syiem Parbat Ray ha ka snem 1500-A.D kat haduh ka jingsynshar u syiem ba khatduh u Rajendra Singh ha ka snem 1835 ka Elaka Labang Nangphyllut Pangam Raliang ka don hapoh ka Hima Jaiñtia. Naduh ka jingsynshar ka sorkar phareng na ka snem 1835 haduh ka 1947 ruh kane ka elaka ka hap ha ka Jowai Civil Sub-division hapoh ka jingsynshar ka sorkar phareng.
Hynrei sngewsih ban ong naduh ba ka ri India ka la ioh īa ka jinglaitluid bad bala pynskem kum ka ri synshar paitbah ha ka 26, January, 1950 lyngba ka jingpynkha ia kita ki District Council haki jaka bashong basah daki jait bynriew ritpaid jong ka jylla Assam la khlad jubor ïa ka Elaka Nongjngi, Elaka Chiliang Myntang Elaka Raliang bad baroh kawei ka Elaka Labang Nangphyllut na ka Jowai Civil Sub-division bad pynhap jubor noh sha United Cachar & Mikirs Hills District ha ka jaka ban don hapoh ka United Khasi & Jaiñtia Hills District.
La ong ba ki Mikirs īakiba la pynkylla kyrteng jait mynta kum ki Karbi ki wan shong shnong shane sha ri lum phahg mihngi ka Hima Jaiñtia antad ha ka snem 1640 -A.D. Kat kum ka jingiathuh jong u Dr. S.K Bhuyan u Historian ba pawnam jong ka jylla Assam u ong ba ki Karbi ki wan na Myanmar, Tibet, China bad shong sah harud jong ka Wah Kulang bad Wah Kulpli, hynrei haka jingshah hiar thma jong ki ha ki syiem Kachari ha ka snem 1640 -A.D te ki saphret kylleng kylleng bad don kiba wan shong shnong noh sha Hima Jaiñtia hapoh ka jingsynshar jong ki syiem Jaiñtia bad shapoh Ribhoi District ha ka jingsynshar ki syiem ka Hima Khyriem. Kat kum ka jingiathuh khana na u Woh Wen Lyngdoh u wei na ki stad khana jongka thaiñ Labang la ong ba shisien ka sngi (ymlah ban tip ïa ki snem) ki Karbi ki īoh bha ïa ka jingieit bad jingshaniah na ki syiem Jaiñtia ha ka por u riew khlaiñ jong ki U Thong Nokbe Teton (nokbe kamut u riewkhlaiñ ne u ramhah) la ong ruh ba une u Thong Nokbe u don bynta ruh ha ka ba pynieng ïa ki mawbynna kiba don ha ka shnong Nartiang bad ha Raliang.
Hynrei ymlah bantip ïa ki daw la mih ka jingiapher jingmut hapdeng ki Pnar bad une u Nokbe te haka wei ka sngi ki kynthei Raliang ki pynbieij ia u ban kiew Sohpieng bad ki shynrang pat ki syiat ia u da ki khnam ynda u don shalor dieng bad u iap noh. Iakane la ong ruh da u wei na ki nongthoh poitri ba pawnam jong ki Karbi u Elisha Hanse u ong kumne, ” Tharwe angsong bat longbin ,
Thai rangkap pen ap rin rin :
La an a jakong kethe ,
Ta thi nangkok lo Thong Nokbe “
Kaba mut , (Ki pynkiew noh īa u h’u dieng sohpieng bad ki syiat da ka ryntih da u khnam, kat kata ka jingkhlaiñ bad kabor, ruh u Thong u iap khlem pat dei por.)
Kat kum Ka jingiathuh jong u Sing Lyngdoh u Woh M. M Thaiang la ong ba ki Karbi ki wan shong shnong sha khappud Labang Nangphyllut Pangam Raliang antad ha ki snem 1920 -A.D shaneng bad kham hadien bad kine ki Karbi ki ioh ban shong bansah ne ban seng shnong da ka jingsngewlem bad ai jaka jong ki Khasi Pnar.
Ha ka history khana pateng jong ki Karbi ka don ka kyntien kaba ki ong, ” Sutong a longle Labang a longle komat si kevang cheng ? ” Kamut, mano ba wan shong wansah nyngkong ha khyndew ki Sutong Khyndew ki Labang ? ( Sutong Labang kamut ki Khasi Pnar) Ka jubad haka ktien jong ki hi ka long , ” Rongpi pen Ronghang atum hen lo , Rengbonghom Recho arni” . Kamut ki arkur ki Rongpi bad ki Ronghang ki dei kiba wan nyngkong haka por u syiem jong ki u Rengbonghom. ” ( Rengbonghom kamut snieh pathaw , ngi ki Pnar ngi shait ong, pyneh snieh pathoo ) kane kadei kawei na ki sakhi lyngba ka khana pateng kaba pynshisha ba ki Khasi ki dei kiba don lypa ha kane ka thaiñ.
Ki shnong Karbi kiba don ha syndah jong ka West Jaiñtia Hills District bad markhap jong ka Elaka Labang Nangphyllut & Pangam Raliang ki long ka Rtiang Sanphaw Khlieh Myn-i , Lakaroi, Tahpat, Stonglapar, Umpawiang, Shnongkroo , Umbaso, Rongpangbong, Chengnan Cherop , Wanpumg, Rongkhlan, Umkhyrmi, Mookoilum, Moothade, bad Tibin bad katto katne ki shnong Nepali kum ka Khanduli Nepali , Nongjrong Moorawi, Umpawiang, Khloolaphiang bad Kdohyermai
Dei kine keiñ kiba don hapdeng jong ka West Jaiñtia Hills District bad ka Labang Nangphyllut & Pangam Raliang kiba longdieng pynkiang bad mawjynthut ïa ka Block-1 bad pyniasoh sha Meghalaya .
Kat haka snem 1990, 2000 shadien kine ki Karbi ki dei kiba duk tasam bha kim don wat tang ki jaiñ ban phong ruh. Ki shynrang ki kyllaiñ da ki jaiñ phali ha syngkai ban da ïaka mynraiñ kaba ngi khot haka ktien pnar ka kleiñ tana bad sleiñ pyrdong . Ki kynthei pat ki sem tang da ki jaiñsem lyngkot da ki rongiong kiba ki thaiñ hi bad teh daki jaiñ ïong ha shadem. Ki khunlung khynnah te ki long lymphuiñ lyngkhuid beit kumto ha baroh ki saw aiom.
Mynda haka por bangi dangrit ha ki snem 1994- 2000 ruh ki Karbi kiba don ha ki shnong Umpu, Rongpangbong Longlethan ki im da ka ba bylla sha ki shnong Pnar kum sha Madan Myn-i , Nongjrong , Lapangap kiba don shathaiñ Barato Mukroh kum ka Umkhyrmi, Mookoilum, Moothade pat sha Deiñler , Lamarang Mowjem Mooluber bad wat shaduh sha Shangpung Raliang .
Ha kito ki por te ki Karbi ki tieng bad burom bha ïa ki Pnar. Ki juh ong , ” Chomang pi aphan si pei kipu , Chomang po a phan si po kipu ” . Kamut , ïa ka kynthei Pnar dei ban khot kmie bad ia u shynrang Pnar dei ban khot kpa. Nangta ki ong ruh, “Samphri pen santang cherwo rih kertang , Do kok e nong nam .. Preng le chapi chelang ta alap en kertang “. Kamut, ki Karbi bad ki Pnar ymbit ban iasih don ka khanatang, ioh bit ka pap ka sang . Haba īa ai ia shim ram ruh ymbit ban shim lap shim sut.
Haka por ba dang don u Dolloi Elaka Labang Nangphyllut u Honriwell Pyrpat i pa i juh ialeit lang bad une u Dolloi bad i iathuh khana ïangi kumne : ba ynda rung u Dolloi sha poh shnong Karbi te ki rangbah kiba dangdon lad ban rieh ban phet te ki phet noh bad kiba dang don hapoh iing te ki khang jingkhang (ki leh kumne ki tieng bad lehraiñ ba kim don ei ei ban ai ) noh bad kibym lap shuh ban leh kumne te ki shim kat kaba don bad ai sngewbha . Ki ong,, ” Dolloi kevang ke arnam arni kavang ason lo”. Kamut, haba wan u Dolloi te lakum ba wan ka sngi lakum ba wan ki blei.
La ong ba ki Karbi ki nud ban īeng ïaleh ïaki Pnar naduh ka snem 2000 sha neng daka jingdon ki kynhun kaikhlaw jong ki .
Kumta kine ki Karbi kim dei ban long dieng pynkiang lane mawjynthut ha kane ka jingdawa jong ki pait ka Labang Nangphyllut ïa ka ban re-transfer ïa ka Block-1 sha Meghalaya.