Hamar ba pynbna ia ka Elekshon Shiteng- samoi ia ka Mawryngkneng, ia ka Mawphlang bad Rajabala Assembly Constituency, kiba la sah thylli da ka jingkhladnoh jong ki MLA kiba la jied ha ka snem 2018, ki Party Saiñpyrthei, kiba la sei Kyrtong na ka bynta kine ki Constituency, ki la kyrmen ban jop u Kyrtong jong ki. Ban pynjop iala u Kyrtong, ki Party Sainpyrthei, kiba pynieng Kyrtong, ki la thaw da bun ki lad ban jop bad ka jingkynnoh kawei ka party ia kawei pat.
Haba la mih ka rai u paidbah ia kiba jop ia kiba rem, ki Political Party (ki Party Saiñpyrthei), ka jingiakynnoh kam pat kut bad ka dangiaibteng ka jingkynthoh, ka jingkynnoh da kumne da kumtai, ba uba jop, u jop da ka bor jong ka Peisa bad kiba rem, ki rem da ka jingbym don Peisa ban thied Vote.
Kine ki jingkynnoh bad ki jingkynthoh jong ki Heh, ki Hain jong ki Party bapher bapher ha kane ka Elekshon shiteng samoi kaba dang shu dep ha kane ka 30 tarik October 2021, ba ka jingjop ka jingrem ka dei da ka bor jong ka Peisa, kane ka jingkynnoh- jingkynthoh ka neh ha ka jabieng jong ki Paidbah khamtam ki Nongthep Vote bad kane ka ap ia ki Kyrtong jong ki Party Saiñpyrthei ki ban pynmih Kyrtong ha ka General Elekshon sha ka Iingdorbar Thaw-Ain jong ka Jylla ka ban sa long khlem pep ha ka snem 2023.
Lada ka jop, ka rem ka shong ha ka Peisa, ka sur jong ki paidbah ka lam byrngeit wat ki briew jong ka party ruh kin ym thep sha u briew jong ka party lymda kin da ioh da ka Peisa. Lada ka Elekshon da pyndonkam da ka Peisa, bun ki briew ki kwah ba kan wan kloi noh ka Elekshon ban ioh Peisa.