Ia ka sngi ki tymmen lane ka International Day of Older Person, la rakhe mynta ka sngi 01.10.2021, da ka ophis jong ka District Social Welfare Officer (DSWO), West Jaintia Hills District, Jowai ryngkat ka jingiatreilang ka Dorbar Shnong Ummulong, ha Ummulong Community Hall, halor ka phang “Digital Equity For All Ages” ha kaba u Medical & Health Officer Ummulong CHC u Dr. S. Sumer u la long u kongsan.
Ha kane ka jingrakhe ia kane ka sngi ba kyrpang jong ki riew tymmen la wan ban iashim bynta tang ki longkmie suda katba naka liang ki rangbah longkpa ym shym la don uwei ruh. Ha kane programme la don ruh ka jingleh check up ia ki ha Community Health Center, Ummulong.
Ha kane ka sngi la ioh ia ka jingbatai bniah halor ki scheme bad ki jingiarap bapher bapher kiba ka sorkar ka ai sha ki riew tymmen da ka kong J. Synnah kaba long ka District Social Welfare Officer Jowai, kaba la batai kumno lah ban ioh ia ki jingiarap ia ki longkmie kiba la don ka rta 60 snem shaneng bad kumjuh ia ki riewrangbah kiba la don ka ka rta kaba 65 snem shaneng. Ka la ong ka sorkar ka la don ruh ka scheme kaba la tip kum ka old age home ne ka iing ri ia ki tymmen na ka ophis jong ka DSWO, hynrei haduh mynta hangne hapoh ka jylla jong ngi ym pat don ki NGOs ne ki kynja seng kiba wan sha khmat ban shim ia kane ka kam bad sa kawei ruh hapoh ka jylla jong ngi ki briew ki dang ieit bad ri sumar hi ia la ki kmie ki kpa tymmen jong ki, ym kum sha kiwei ki ri kiba don kam shisha ia kum kane ka iing ri ia ki tymmen.
U kongsan u Dr. Sumer ha ba kren, u la iathuh ba ha ki jaka ai jingsumar kum ha ki Welness Center la don ka Departement kaba ka sorkar ka la buh tang na ka bynta ki tymmen na ka bynta ban test ne thew ia ka jingpang BP, Shini, ban ai ia ki dawai Vitamin, dawai snam, dawai Calcium, dawai Acid bad kiwei de lyngba ki ASHA bad ki nurses. U la iathuh ruh ba ki jingpang ba ki riew tymmen ki kloi bha ban ioh ki long kum ka jingpang Cancer, pang mat ne kdor ki kti ki kjat bad kaba ma ka dei ka jingpang shini, Cancer bad kingbaiong, kumta na ka liang jong u Dr. Sumer u kyntu jur ia ki riew tymmnen ba kim dei ban pynslem ban leit sha ki jaka sumar mar sien sngew ia kino kino ki rukom pang ne shitom, khnang ba ki doktor ne ki nurse kin ioh ban leh ia kaba donkam ha ka por kaba dang biang.
U la ong ba ka jingrakhe ia kane ka sngi ka long kum shi bynta ban kynmaw ia ki nongshnong shnong kiba la iaw ka rta kumjuh ruh ia ki kam jong ki kiba ki la noh synniang sha ki long iing jong ki bad kumjuh ruh ban ai ka jingiada bad sumar bad ban burom ia ki riew tymmen.
Ia ka jingialang mynta ka sngi la pyniaid da u Assistant Waheh Shnong Ummulong ma A.R. Bathew Pala bad la ioh ruh ia ki jingkren na u Waheh Shnong Ummulong ma L. Laloo, Supervisor DSWO, Jowai ma P. Chyrmang, kumjuh ruh na kawei na ki riewtymmen. Na ka liang ka ka ophis jong ka DSWO ka la ai ruh ki jingai sngewbha sha baroh ki longkmie ba la iaw ka rta kiba la wan ban ia shim bynta sha kane ka jingrakhe ia kane sngi jong ki.
