Ka Shnong Panaliar, Jowai ha kane ka janmiet jong ka sngi Saitjain (06.09.2025), ka la pyllait paidbah ia kiTtiket Lucky Draw ki jong ka, na ka bynta ban pynkhalai ha ka Fete, jong ka shnong ka ban sa long ha u bnai December, 12 bad 13 tarik 2025.
Hashwa ban pyllait paidbah ia kine ki Ticket, la don ka jingialang ba lyngkot, ha kaba lawan ban sakhi kum u kongsan da u bah Nidamon Chulet, u badei uwei na ki Entrepreneur ba pawkhmat napoh ka District Jaiñtia hi baroh kawei bad la synran ia u da u bah Roiki Iakai. Ia ka jingialang la pyniaid da u Assistant Waheh Chnong ka shnong, ma Arwotki Sumer bad laioh ia ki kyntien ai nguh na u Tista Paswet.
U Riquoma Rq. Laloo, Waheh Chnong, u la lamkhmat ia ka jingkren da kaba batai lyngkot ia ka jingiaid lynti ka shnong Panaliar ban pynmih pisa na ka bynta ki kam babha kiba ka la lah ban pyndep na ki por sha ki por. Mynta hi ka jingthmu ban pynmih pisa ka long beit ban pyndep ia ka Indoor Sports & Games Complex.
U la pynbud da kaba ong, ka jingnoh kylluid mynsiem ki khun ka shnong Panaliar naduh kipor mynshwa haduh mynta, la lah ban pyndep ia kino kino ki jingtei hapoh ka shnong. Ymlah ruh ban len ba, ka Sorkar ruh ka la iarap na ki por sha ki por ryngkat ki nongmih khmat jong ka thaiñ naduh ki Local MDC, Local MLA, MP Rajya Sabha bad u Governor ka jylla. U la ong ba mynta ka snem, la khmih lynti ban ioh iarap shuh shuh na ki babun ki liang bad na ki paralok ba najan bad najngai, khamtam ki khun ka shnong bad ki nongshong shnong hapoh ka shnong Panaliar.
U Kongsan, ma Nidamon Chulet, u la iaroh shi katdei eh ia ka shnong Panaliar, ba ka long kawei na ki shnong, kaba la nang la stad ha ki ba bun ki liang. Na ka bynta katei ka jingthmu ba bha ban pyndep ia ka Indoor Sports & Games Complex, u la ai ka jingiaroh namar ba ka Sports hi ka long kawei na ka bynta ba kongsan ha ka jingim briew ka jong ngi. U la kyntu ia ki kmie ki kpa, ban pynshlur ia la ki khun ban ailad ia ki, ban iashim bynta ha ki jingialehkai Sports.
“Ka pyrthei mynta, ym shuh kum ha ki por mynshwa, mynta lah ban kamai jakpoh na ka Sports ruh ong u ma Chulet, u la ong, ban a ka liang ka Sorkar ruh ka pynshlur bad iarap ia ki nongialehkai Sports, ymdei ban shu shaniah tang ha ki kam Sorkar, ong u ma Nidamon. U la kyntu ia ka shnong Panaliar ban pynneh ia ka jingiatylli ka jong ka, khnang ba ka shnong kan myntoi ha ki babun ki liang. U la ong ba ka jingiatylli, ka wanrah ia ka jingioh nong bad ka jingioh nong ka pynphuh pynphieng ia ka shnong hi baroh kawei. U la khot la wer ia ki paralok ban don ka mynsiem iarap da kaba wan sha ka Fete jong ka Shnong Panaliar ka ban long ha ka 12 & 13 tarik December 2025 bad thied ruh ia ki Ticket Lucky Draw ka Shnong, kiba don ki Prize ba itynnad bad dondor. U la kitbok kitrwiang ia ka shnong ba kan lah ban pyniaid bha ia ki Ticket naduh mynta haduh ban da poi ka Fete.
La ioh ia ki kyntien ai khublei na u Marryngkat Syngkon, General Secretary ka Shnong Panaliar bad u la pynbna ha kajuh kapor ia ki Prize ba ki long kumne, ka 1st Prize ₹700,000/-, 2nd Prize ₹300,000/- , 3rd Prize Yamaha Scooty lane lah ban shim da ka pisa ₹100,000/- bad 5 (san) tylli ki Consolation Prizes kiba kynthup ₹10,000/- kawei. U la ong ba kino kino kiba kwah ban pre-booking ia ki Ticket, ki lah ban contact ha kine ki number 8974594820 / 8794864344.
