Ka Dorbar Shnong Chutwakhu, Jowai mynta ka sngi kala pynhap pyrda ïa ka jingrakhe dap 100 snem ne ka ‘Centenary Jubilee Celebration’ haka jingïalang bala pynlong ha madan Jrisaleiñ, Jowai.
Ïa kane ka jingrakhe ba shi snem lynter la wan ban plie pyrda ïa ka haka 10 tarik u Kyllalyngkot, 2025 da u myntri rangbah ka sorkar jylla u Conrad. K. Sangma.
Katba ha kane ka sngi pynkut 27 tarik u Nohprah, 2025 la wan ban donlang naduh u MLA ka thaiñ u ma Wailadmiki Shylla kum u kongsan, u MP ka Lok Sabha Dr. Ricky A. J. Syngkon, u MP ka Rajya Sabha u Dr. W.R. Kharlukhi, u Waheh Shnong ma P.W. Lyngdoh, ki nongkitkam shnong kynthup ïakiba rim bad kiba thymmai, nalor ki Waheh Shnong ka sor Jowai bad ki nongshong shnong kiba la mih shitrhem naduh ki khynnah ki khunsamla, ki longkmie ki longkpa bad ki riew tymmen.
Baroh kiba ai jingkren ha kane ka sngi kila ai ka jingïaroh ïa ka Dorbar Shnong Chuwakhu kaba la lah ban jam shaduh une u mawmer jong ka jingïaid lynti ba 100 snem, da kaba ong kane kam dei kaba suk ha ka jingïaidlynti hynrei kine baroh ki jingjop jong ka shnong dei da ka jingïatreilang bad ka jingïasnohktilang jong baroh ki nongshong shnong.
Kum ka shnong kala ai ka khublei ïa ka sorkar kaba la ïarap ïa ka shnong ban pynïaid shakhmat ïa ki kam pynroi hapoh ka shnong naduh ki surok, ki umbam umdih, ka ïing dorbar bad kiwei.
Na ka liang u kongsan ula pynhiar ruh ïa ka lama jong ka shnong kum ka dak jong ka jingpynhap pyrda ïa ka jingrakhe bad haka juh ka por la plie pyrda ïa u mawnongrim ban tei ïa ka paiñkhana, ka jingpynheh ïa ka ophis treikam bad u maw sah kynmaw jong ka jingrakhe dap 100 snem.
Haba phai khyndiat shaphang ka Dorbar Shnong Chutwakhu, Jowai la seng ïa ka ha ka snem 1925 hapoh ka jingïalam jong ki Rangbah bad ki Samla kum ki jong u Mr. O. H. Rease (Omil Haris Shullai), Mr. Lomiwell Shylla bad Mr. Phelickstone Rymbai bad kiwei de ki Rangbah, ka dong Chutwakhu ka la seng ia ka Club la jied ïa u Katmon Dome ban long u President jong kata ka Club bad u la neh ha kane ka kam haduh ka snem 1938 (lait noh u snem 1930 ba la seng ïa ka Chutwakhu Society bad la thung President ïa u Woh Dabit Laloo).
Ha ka jingïalang jong ka Dong kaba la long ha ka 4 February, 1930 la seng ïa ka Society bad la pynkylla noh ïa ka Chutwakhu Club sha ka Chutwakhu Society ka ban peit bad pynïaid lang ïa ki kam ba bunjait ka dong ha ka imlang sahlang.
Da ka jingdawa ka kam bad khnang ba ka nym long ka jingban khia ïa ka Ophis jong ka Club bad ha ka juh ruh ka por khnang ban ailad ïa ki samla ba kin ïa shim bynta ha ki kam bapher bapher jong ka Club, naduh ka snem 1988 haduh ka snem 1999, la pynmih ruh sa kiwei ki Branch Committee kum ka Sports & Youth Affairs, Education, Vigilance, Registration, Music, Art & Culture, Counselling & Finance Committee.
Na ka bynta ka shongsuk shongsaiñ hapoh Dong poh Shnat la seng ïa ka Vigilance Committee ha ka 4.9.1992 bad kane ka Committee ka dang trei ia la kam haduh mynta.
La seng ïa ka Education Committee ha ka snem 1998 da ka jingthmu ba kane ka Committee kan peit ïa ka jingroi ha ka liang ka pule ka dangle hapoh ka Dong ka Shnat bad kumjuh ruh ban peit ia ka jingiaid shaphrang ka Lower Primary School jong ka Club.
Ha u snem 2024, katkum ki kyndon treikam jong ka District Council la donkam ban pdiang noh ïa ka SANAD bad ïa ka kyrteng Chutwakhu Social Welfare Local Dorbar, Jowai la pynkylla noh sha ka Dorbar Shnong Chutwakhu, Jowai.
Ïa ki kyntien pdiang sngewbha ha kane ka sngi la ïoh na u Waheh Shnong ma P.W Lyngdoh, ka jingduwai na u Rev. B.B. Lamin, ki jingrwai na ki khun ka shnong bad la pynphuh pynphieng shuh shuh da ki jingshad pliang nalor kiwei de.
Ha kane ka sngi la ai khusnam da ki Memonto sha ki nongkitkam shnong kiba la synñiang naduh ki por ba sdang jong ka shnong da kaba aiti sha kiba haïing ha sem jong ki bad kumjuh ïa kiba dang don haduh mynta. La pyllait ruh ïa ka kot thup sah jingkynmaw (Souvenir), ïa ki kyntien ai khublei la ïoh na u General Secretary ka shnong ma H.M. Bareh.
Katba haka por 6 baje janmiet kala don ka Musical Evening bala shim bynta da ki kynhun bapher bapher.
