La lympung ba 19 kan long ha ka Seng Khynnah Seng Khasi Ri War Mihngi
Ka Lympung jong ki Khynnah Seng Khasi Seiñ Raij kaba 18 (Khadphra) la pynkut ïaka ha kane ka 21 tarik u Kyllalyngkot haka shnong Nongkynrih ha Madan Siej Kynden, Laskeiñ Block, West Jaiñtia Hills kaba hap hapoh ka Elaka u Dolloi Raliang.
Ïa kane ka lympung jong ki khynnah Seng Khasi Seiñraij la sdang haka 20 tarik bad pynkut ha ka sngi U Blei 21 tarik, ha kaba la wan ïashim bynta na kylleng Khasi-Jaiñtia hapoh ka jingpeit jong ki Nongsikai jong ki Shlem Sikai Ñiamtre-Ñiam Khasi bapher bapher kiba la wan ha ryngkat ka riam ka beit kaba shongkhia bad shongkun.
Ha ka 21 tarik ïaka Lympung la pynïaid da ka Tyngkai I Man Synnah bad ka Wailadmi Dkhar bad la don ka jingduwai ainguh bad ki kyntien pdiang sngewbha.
Ha kane ka Lympung la wan ban sakhilang kum ka jingai mynsiem ïa ki khynnah rit da ki Dolloi, ki nongïalam ñiam jong ki Raij ki Shnongr, ki longkmie ki longkpa, ki samla bad kiwei de kiba la wan na ki tnat Seng Khasi Seiñraij bapher bapher jong ka Ri Lum Khasi-Jaiñtia.
U Rangbah Aiban Swer, (Retired) Additional Director Soil & Water Conservation Department, Govt. of Meghalaya haka jingkren kum u kongsan, ula ai ka jingïaroh ïa ki nongïalam jong kane ka lympung kiba la shim khia ban ïalam lynti ïa ki khynnah Seng Khasi-Seiñraij ba kin tip ïa ka ñiam ka rukom bad ka riti ka Dustur.
Ha kane ka lympung la don ruh ki jingïalehkai naduh ka Drama tynrai, ki jingrwai, ki jingshad, ka jingpule ïa ki ktien tymmen, ha ka juh ka por la pynkup burom kyrpang ïa ka kong Mera Dkhar kawei na ki longkmie kaba la seng ïa kane ka Lympung Khynnah Seng Khasi-Seiñraij.
La pynkut ïa kane ka lympung da ki kyntien ai khublei na ka Opaiadaka Dkhar, ha kaba la don shwa ka jingaiti ïa ka Dongmusa na u Waiphang Suchiang, Seinraij Nongkynrih Laskeiñ Pyllun ha u Kharsawkpoh jong ka Seng Khynnah Seng Khasi Ri War Mihngi kaba long ka tnat Seng Khasi ka ban shimti ban pynlong ïa ka Lympung ba 19 ki khynnah Seng Khasi-Seinraij bad la pynhiar ïa ka lama jong kane ka Lympung ba 18 mynta u snem da u Dolloi ka Elaka Mynsoo.
