Ka ophis jong ka District School Education Officer (DSEO), West Jaiñtia Hill, mynta ka sngi kala rakhe ïa sngi ba kyrpang ki nonghikai ne ka 62nd Teacher Day Celebration, kaba la pynlong ha District Library Auditorium, Jowai.
Kane ka jingrakhe kala long kaba iphuh iphieng, ha kaba u Symbud myntri rangbah ka jylla u ma Sniawbhalang Dhar ula long u kongsan ha ka jingïadon lang u ma Wailadmiki Shylla, MLA ka Jowai kum u symbud kongsan, ka DSEO kong A.P Syiem, u Doloi Elaka Jowai ma Puramon kynjing, u SP ma C. Syrti, u DC ka WJHD bha B.S Sohliya ki nonghikai, ki khynnah skul,bad kiwei.
U kongsan haba kren u la pynkynmaw ïa ka jingtrei trei shitom jong ki nonghikai ym tang ba ki ai ka jinghikai hynrei ïa ki jingsneng jingkraw ïa ki khynnah skul, ula ong kum ki nonghikai ki dei ba long ki nonghikai kiba sngew ïa ki khynnah skul jong ki kum ki khun jong ki hi.
Ula ïathuh ba na ka liang ka sorkar ka la pyrshang katba lah ban kyntiew ïa kam pule puthi hapoh ka jylla bad ki don ki bynta kiba la trei bad don ki bynta kiba la sdang trei, khamtam ïa ki building skul, ki jaka kaba ïadei ha ka jingpyntbit shuh shuh ïa ki nonghikai. Ula ïathuh ka sorkar ka la wad ki lad ki lynti ha ka jingïadei bad ka tulop jong ki nonghikai SSA bad kiwei de.
U ma snaiwbha ula ai ruh ka jingïaroh iï kawei na ki skul kaba don hapoh ka West Jaiñtia Hills District kaba la lah ban wanrah ïa ka nam ka burom ïa ka District bad ïa ka jylla hi baroh kawei.
Ha kane ka jingleh burom ïaki nonghikai la don ruh ka jingpynkup burom ïa ki nonghikai kiba kynthup ïa ka Wanhok Lamar na Vice Principal Q.C. Springside HS School Jowai (Secondary Level), ma Ohiwot Laloo Assistant Teacher Government Girls HS School Jowai (Upper Primary Level) bad ka hilarious Manner Head Teacher Umladkhur Government LP School, Khonglah (Lower Primary Level).
Katba ïa ki Scout & Guide Master pat kiba ïoh ïa ka jingpynkup burom ki kynthup ïa u Jonas Phawa na Tome Memorial Higher Secondary School Jowai bad ka Dolly Lamare na Little Angel Secondary School Jowai.
La pynshongshit bad pynphuh pynphieng shuh shuh ïa kane ka sngi leh burom ïa ki nonghikai da ka jingrwai, jingshad kiba la shim bynta da ki khynnah skul bapher bapher ka nongbah Jowai.
