Ka Khasi Student Union (KSU) Jaiñtia Hill District ha ka 15 tarik mynta u bnai ka la leit ban iakynduh ia ka Principal jong ka Kiang Nangbah Government College Jowai ha kaba iadei bad ka jingpynrung klas ia ki samla pule ha katei ka College. Namar katkum ka jingtip ka seng ba bun palat ki samla pule kiba lah duh ban pynrung ialade hadien ba lah mih ka thup kyrteng kaba khatduh (3rd list) ha kine ki sngi ba lah dep.
Ha ka jingiakren bad katei ka Principal jong ka Kiang Nangbah Govt. College Jowai ka seng ka lah kren shai ba ym dei ban don uwei ne kawei ruh ki samla pule ki ban duh rung klas kiba lah aplai ha katei ka College Sorkar namar ba kim don lad shuh shawei khamtam ba bun hi kiba aplai ha katei ka college dei ki samla kiba wan na ki longïing baduk.
Ha kaba iadei bad kane na ka liang jong ka seng kan ap haduh ban da dep siew ki samla ba lah ioh rung admission ha katei ka college, khnang ban ioh ia ki kyrteng bad ki jingdon jong ki samla ki bym pat ioh ban rung klas ha katei ka college. Khnang ba ka seng kan ioh leh ia kaba donkam ban ioh pynrung klas ia baroh ki samla pule kiba la aplai ha katei ka kolej.