Kyntu na ka sorkar ban pyndep kloi noh kitei ki nalla ba dang sah teng
Ka Khooid Ya Ka Wah Myntdu (KYM) kum shibynta ka jingïakhun ka jong ka ban ïada, ban pynneh, pynbha bad pynitynnat ïa ka Syiem Myntdu ka jingim ïa ki lakh ngut ki mynsien ba im ba sah ha talawiar jong ka, mynta ka 14 tarik u Naiwieng ha ka jingïalam u Khroo L Pariat President ka seng, u rangbah S.K. Lato uwei u riew rangbah ba la shemphang bha ka Ri Jaiñtia bad kiwei ki Riewpaw khmat ka Jowai ryngkat ki samla ki la leit ban buddien ïa ka jingpyntreikam ïa ki in situ nallah ne ki wah duid ba la shna kyrpang na ka bynta ba ka Um kaba wan na ki ïing ki shnong kan tuid ha Myntdu kan long kaba khuid.
Ïa kine ka in situ nallah la shna naduh u snem 2022 da ka tnat pynïaid Sor (Urban Department) bad ka Jowai Municipal Board ha ki 11 tylli ki wah duid ba tuid sha Myntdu ha Jowai.
Ka daw ka jingleit hiar ka KYM sha kitei ki jaka ha ka jingdonlang u ma H. Passah Executive Engineer JMB ka long ban kyrpad ïa ka Sorkar jylla ban shna kloi noh ïa kitei ki nalla kiba dangsah teng, khlem lah treikam la ar snem mynta bad ban pyntreikam pura ïa ki ha kine ki bnai tlang, katkum kular ba la ai da ka Sorkar jylla na ka por sha ka por.
Ka KYM kam kwah ban ïohi ba kine ki jingtei ban pynim ïa u bynriew, kin sah tang kum u Ruh, khlem lah ban pyntreikam. Lada ka Sorkar ka pyntrei hok ïa kane ka jingtei, ki nongshong shnong kiba im na ka Myntdu kin ïoh ïa ka Um na ka tnat PHE (E) Jowai da kaba khuid ym tang da kaba jngiar bad ki nongrep ha ki Pynthor Kba sha neng bad sharum ka Myntdu kin ïoh Kba ïoh khaw ïa ka shnong ka thaw baroh.
Ka KYM ka lap ba kine ki jingtei ki ïarap bha ban tehlakam ïa ki jingtuid ki jri, ki ñuit, ka Um Jakhlia ba mih na ki ïing, ki ïew ha Jowai sha ka Myntdu. Ha kajuh ka por ka KYM ka la leit ban peit ïa ka jaka ba pyndonkam ka JMB ban kylliang kali kit ñuit na kaba rit sha kaba heh ban kit na Jowai. Ha kaba ka KYM ka la kyrpad ïa ka CEO JMB lyngba u EE ban pynkhuid mar mar ïa ka ñuit ba hap na ka truck sha madan khnang ban ym lap ka jingsma jingtung bad kan ym tuid sha ki tyllong Um ba poi sha ki lyngkha bad sha ka Myntdu.
Khnang ba ki nongshong shnong kin lait na ka jingkordit bad jingjynjar ha ki snem ban wan na ka jingduh ïa ka Um na ki Wah ne na ka Myntdu, ka KYM ka kyrpad ïa ki nongshong shnong bad ki Waheh Chnong jong ki shnong kiba sah ba im ha shilynter ka Myntdu, kin sngewbha ban ïa treikamlang ryngkat bad ka KYM ha kane ka jingïakhun ka jong ka, da kaba bret ïa ki ñuit ba pyut ha ka khyndew ban long sboh bad pyndonkam da ki pla jaiñ bad ki khiew ha ka rah ka rong ïa ki jingdonkam na ïew ba man ka sngi.
La pynsngew ka jingbret pathar ïa ki jri ki plastic kat sha kaba lap ba i biang, ka long kumba la pynkhreh lypa ïalade ïa ka jingkyrduh la ong ka seng KYM.
