U Myntri ka tnad Social Welfare ka Sorkar Jylla, u Bah Paul Lyngdoh, u la lum ia ka jingialang ka Drugs Reduction Elimination & Action Mission (DREAM) ban ïatai halor u drok ha kaba u la iathuh ba ka sorkar ka la shim ia ka rai ban buh ia ka Vehicle Scanning Machine (VSM), na ka bynta ki kali ki ban rung sha ka Jylla kane ka long kum shibynta na ka jingpynkhlaiñ jong ka Jylla ia ka thma pyrshah droks ban tehlakam ia ka jingwan rung u droks ha ka Jylla. U la pynshai ruh ba ia ka Vehicle Scanning Machine yn buh ha Ri-Bhoi bad East Jaintia Hills District, kiba dei ki artylli ki jaka rung sha ka Jylla Meghalaya.
“Ngi la iakren ia ka jingdonkam ban pynieng ia ki Vehicle Scanning Machine ha ki Entry Point jong ka Jylla kaba mut ha Ri-Bhoi bad East Jaintia Hills. Ia kine ki machine yn pyndait hapoh ka hynriew bnai. Ka jingpyndait ka donkam ruh ia ki briew kiba la tbit ban pyndonkam ia ki tiar bad ban ioh bat ia kano kano ka kali kaba ishankhmat” iathuh u Bah Paul.
U Myntri ula iathuh ba ka jingthmu ban buh ia ka screening vehicle, ka long ban pynlong ia ka jingtalashi ia baroh ki kali ki ban rung sha ka Jylla.
U Bah Paul , u la pyntip ruh ba ha kane ,ka jingialang kala rai ruh ban nang pynkhlain shuh shuh ia ka Anti Narcotics Task Force (ANTF) ban iakhun pyrshah ia ka kam khaii droks hapoh ka Jylla.“Ngi la bthah ia ka tnat Pulit, ba kan pynkhreh ia ka jingtyrwa halor ka jingdonkam briew kiba lah ban buh beit thik sha ka ANTF khnang ba kan nang pynkhlaiñ ia ka jingtreikam ha ka jingiakhun pyrshah ia ka kam khaiī drok da kaba kdew ruh ba ka jingkhaïi drok, kaba dei ka jingma ba khraw bha ia ka Jylla namar ka jingiajan ia ka Ïew drok, kaba dei ka Myanmar nalor ba ka Jylla ka don ia ka lynti iaid kaba jrong na kawei ka Jylla sha kawei pat kata naduh Ri-Bhoi sha East Jaintia”u la bynrap .
Ha kajuh ka por, u Myntri ula ong ba ia ka Meghalaya Police Act, 2010, yn sa pynkylla noh khnang ban lah pynbiang ia ki jingdonkam jong ki Volunteer, kiba dei shibynta jong ka Village Defence Party (VDP).
Halor ka jingwanrah ia ki Fast Track Courts, u Bah Paul ula ong “Ngi la rai ruh ba ka don ka jingud jingnam na ki paidbah halor ka jingiaid slem palat ki mukotduma kaba la ktah ruh ia ki nongmudui bad ki nongai sakhi, kumta ka Sorkar Jylla kan sa thoh lyngba u Myntri Rangbah ka Jylla bad ruh ban iakren bad u Chief Justice ka High Court ka Jylla khnang ban lah pynsted noh ha ka ban pynkha ia ki fast track court, ki ban tian bishar ia ki mukotduma man la ka sngi”.
Haba kylli ia ki jingdawa jong ki kynhun Sengbhalang, u Myntri ula ong ba ka Sorkar kan leh ia la ka jong ka kamram hynrei kan nym leh ia kano kano ka kam hapdeng ka jingshah pynbor bad kubur ruh ia ka jingkongsan ban iasam ia ki jingtip bad kiwei pat ki Jylla ba Shatei Lammihngi.