Kum shi bynta ka jingrakhe ha ka ri baroh kawei shuwa ka International Day of Yoga (IDY) 2025, ka Central Bureau of Communication (CBC) Shillong, kaba hap hapoh ka Tnad Information and Broadcasting, Sorkar India, ka la pynlong ïa ka prokram pynsngewthuh shaphang ka Yoga mynta ka sngi ha Laitumkhrah Assamese Secondary School, Shillong. Ïa kane ka jingïalang la pynlong ha ryngkat ka jingïatreilang bad ka Meghalaya Yog Samiti ban kyntiew ïa ki jingmyntoi jong ka yoga bad ka bha ka miat ba pura hapdeng ki khynnah skul bad ki briew ba iadon bynta kad kane ka skul.
Ka phang pdeng jong ka sngi Yoga mynta u snem, “Ka Yoga na ka bynta kawei ka Pyrthei, kawei ka Koit ka Khiah”, ka pyni ïa ka jingïadei jong ka koit ka khiah shimet bad ka rukom im ka bym ktah ia ka mariang. Ka prokram ka thmu ban kyntiew ia kane ka jingngeit hapdeng ki samla pule da kaba pynshlur ia ki jingmlien kiba koit ba khiah, ka jingskhem jingmut, bad ka jingkitkhlieh ia ka mariang. Ki khynnah skul, ki nonghikai bad ki khynnah ba long dkhot jong ka NCC ba la ïalam da ka nonghikai jong ki, ka Sangeeta Chakraborty ki la ïashim bynta shitrhem ha kane ka prokram Yoga.
U Dipankar Nandu, State Secretary jong ka Meghalaya Yog Samiti, u la ai jingkren sha ki khynnah pule bad u la ïasam ba ka yoga kam dei tang ka rukom kilan met, ka dei ka rukom im kaba kyntiew ïa ka jingïatylli hapdeng ka met, ka jingmut jingpyrkhat, bad ka mariang. U la pynshlur ia ki samla kiba iashim bynta ban pynlong ia ka yoga kum ka jingmlien kaba man ka por na ka bynta ka jingkoit jingkhiah kaba neh.
Ban kyntiew ia ka jingpule bad jingiashim bynta, la pynlong ia ka jingiakop dro dur halor ka phang pdeng jong ka yoga. Ki khynnah pule ki la pyni ia ki jingsngew jong ki shaphang ka yoga bad ka jingkoit jingkhiah. Hadien kane ka la don ka Quiz halor ka Yoga bad ka jingtip ba kongsan shaphang ka Meghalaya, kaba la saindur khnang ban kyntiew ïa ka jingsngewthuh shaphang ki rukom sumar hyndai jong ka ri India bad ban pynjylliew ïa ka jingsngewthuh jong ki khynnah pule shaphang ka jaka bad ka kolshor jong ka jylla jong ki. La ai khusnam bad ki syrnot sha ki nongjop ha baroh ar tylli ki jingiakop, kum ka jingithuh ia ka jingtrei shitom bad jingiashim bynta shitrhem jong ki.
Da kaba phaikhmat sa ka mariang ha kane ka prokram, la thung ia ki dieng soh ha ka phyllaw jong ka skul hapoh ka kam “Ek Ped Maa Ke Naam”. Kane ka la pynskhem ia ka khubor jong ka jingsumar ia ka mariang bad burom ia ka mariang.
Ka prokram Pynkhreh ïa ka International Day of Yoga 2025 da ka CBC Shillong ka long kum ka jingsdang kaba don jingmut ïa ka jingrakhe ha kylleng ka pyrthei ha ka 21 tarik Jylliew, kaba la ai mynsiem ïa ki samla ban pdiang ïa ki rukom im kiba koit ba khiah, ban burom ïa ka mariang, bad ban ïai ïasoh bad ki rukom im tynrai jong ka ri India.
