Da ka mynsiem kaba sngewsih bad sngewkhia, u Lat ka jylla Meghalaya, u Phagu Chauhan u la phah ia ka khubor sngewlem sha ki bahaiing ha sem bad ki lok ki jor jong ki 2 ngut ki IAS Officer ba la shongthait, kata u S.F. Khongwir bad u D.K. Dkhar kiba la khlad noh mar ia bud na kane ka pyrthei ha ka 14 bad 15 tarik u Risaw, 2023.
U bah Dkhar bad bah Khongwir ki long ki nongtrei sorkar kiba tbit bha kiba la aiti lut ia la ka jong ka jingiaid lynti na ka bynta ka jing kham bha bad jingroi ka jylla Meghalaya. Ka jingaiti lut bad ka jingnoh synniang jong ki na ka bynta ka jingkiew shaphrang ka jylla ha ki liang kiba bun ki long kiba kordor haduh katta.
Ka jingmut ba kylluid bad ka mynsiem syngew synei u bah Dkhar ryngkat bad ka bor treikam bad ka jingsngur jingmut u bah Khongwir, ka pynlong ia ki kum ki nuksa ia kiwei pat ki para nongtrei sorkar kiba bun . Ka jingkhlad noh jong ki ka long ka jingduh kaba khraw ia ka jylla bad ki briew kumjuh.
U Lat u pynpaw ka jingburom ia ka jingbym thait jong ki ban aiti lut ban pyndep ia la ki kamram khlem ka jing khmih lynti ban ioh myntoi eiei.
Ki jingmut jing pyrkhat ryngkat ki jingduwai u Lat ki long ryngkat bad ki bahaiing ha sem u bah Dkhar bad bah Khongwir ha kum kane ka por ka jingsngewsih.