(By. M.M. Thaiang)
Ka Dorbar Seiñkur Soowyrnai, kaba kynthup ïa ka kur Mulieh, Luhuid, War bad Papiah (Jat) kaba la long ha kane ka 9 tarik Risaw 2021, ha Lutituber Community Hall Ialong, hapoh ka jingpynïaid u Waheh Mekirot Mulieh, ka long ka Dorbar Seinkur kaba phuh kaba phieng ha kaba naduh ki Rangbah, ki longkmie, ki Samla-Khynroo-Khyllood jong ka Seiñkur ki la ïa wan shim bynta shongshit.
Ha shwa ban sdang ïa ka jingïalang la ïoh ïa ka jingkren Maitphang bad ïa ka jingthmu jong ka jingïalang da u Waheh Mekirot Mulieh, uba long ruh u Nongpynïaid jong kane ka jingïalang. Ha shwa ba ka kong Mila Mulieh, kawei na ki longkmie ba pawkhmat jong ka Seiñkur Soowyrnai kan khap (ot) ïa u Ribon kum ka dak ka jingplie ïa ka jingïalang, la don ka jingpyndeng syntiew ïa baroh ki longkñi, ki longsan bad ki longkmie ba pawkhmat jong ka kur.
Ha shwa ban ïoh ïa ka jingkren bad ïa ka jingsneng jingkraw jingkyntu kynpham na ki Rangbah jong ka Seinkur Soowyrnai, la ïoh ïa ka Duwai, ka Phirat ha U Blei, ha ki Blei da u Waheh Khain War bad ka jingkren pdiang burom ïa ki Rangbah, ki Longkmie, ïa ki khun Khynroo-Khyllood jong ka Seiñkur Soowyrnai da ka kong Meetaroy Luhuid.
Ha kane ka Dorbar la ïoh ïa ka jingkren da u Waheh Boimi Mulieh, halor ka phang ka jingïaid lynti ka Seiñkur Soowyrnai naduh ba la seng ïa ka bad ïa ki mat treikam jong ka. Nangta u Waheh Kmen Luhuid, haba kren ha kane ka Dorbar, u ai ka jingsneng jingkraw, ka kyntu ka kynpham ïala ki para kur ba horkit hordang ba ka kur kam dei ban don ka jingsngew niam bad ym bit ban leh Politic ïa ka kur.
Nangta u Waheh Masan War, uwei na ki longsan jong ka Seinkur Soowyrnai haba kren ha kane ka dorbar, u khot ïa baroh ki khun jong ka kur Soowyrnai kiba don ha Ialong bad kiba don ha kiwei pat ki shnong kiba don hapoh ka Bri U Hynñiewtrep ban ïa long tylli myllon kawei. Shuh shuh, la nangïoh ïa ka sneng ka kraw, ka kyntu ka kynpham, ka kyntu, ka kynrong ïa ki khun jong ka kur Soowyrnai ban long kiba tipbriew, tipblei, tipkur, tipkha, tiplok, tipjor bad kiba tipkher- tipmer, kiba tip ka Akor, ka Burom ha ka ktien ka thylliej, ha ka riam ka beit bad ha kaba kyntiew ïa ki khun jong ka kur iwei ïa iwei pat ha ka imlang ka sahlang, ha ka khia ka shon bad ym tang hapdeng ki khun jong ka kur, hynrei hapdeng ki para briew da u Waheh Chilborn Luhuid.
U Waheh Moonlight Mulieh, uwei na ki longsan jong ka Soowyrnai, haba kren ha kane ka sngi, u ai ïa ka Khanatang (History) naduh kaba sdang ka Seiñkur Soowyrnai, ka jingïaid lynti jong ka bad ka jingbym ïadei kur shuh hapdeng Soowyrnai bad ka Kur Phawa Lyngdoh. Ha kane ka Dorbar Seiñkur Soowyrnai, ka shnong Ialong, la nangiphuh iphieng da ka jingïadonlang ki Rangbah Kur kum ki jong u Waheh S. Luhuid, Waheh S. War, Waheh Marki Mulieh Ex.MDC bad kiwei de ki Rangbah Seiñkur jong ka Soowyrnai.
Ha kane ka Dorbar Seiñkur Soowyrnai, la nangpynjahthait, jahjrem ïa ki Nongwan Dorbar da ki Cultural Programme kiba la pynkhreh janai da ki khun Samla- lud (Khyllood) jong ka Seiñkur. Ia ka jingduwai ainguh ïa U Blei, ïa ki Blei la duwai ainguh da u Waheh Nishwa Luhuid bad ïa ka jingkren ai khublei leitsuk ïa baroh da ka kong Linda Mulieh.