Ka Shad ñiam Behdeiñkhlam kaba ju long shisien shisnem jong ka Seiñ Raij Jowai mynta ka sngi (Muchai) kala poi noh sha kaba kut hapdeng ka jingiphuh iphieng ba la shim bynta da ki khun ka Seiñ Raij Jowai ha ryngkat ka shad ka kmen bad ka put ka tem ha Syiem Aitnar.
Ïa kane ka shad ñiam Behdeiñkhlam kaba ki khot ka ‘saw sngi lai miet’ la sdang naduh ka 6 tarik bad pynkut mynta ka sngi 9 tarik u Naitung, 2026 ha kaba la pyndep ïa ki jinglehñiam naduh ka nguh ka dem, ka suit ka shor, ka jingpyndep ïa ka Siang ka Pha, ka jingleit rah ïa ka Symbood Khnong, ka Khnong Blai, ki Deiñkhlam, ka bam tyngkong, bad kiwei de ki kam ñiam kam rukom ba la pyndep da u Dolloi ka Elaka Jowai, u Langdoh, u Pator bad ki Waheh Wasan.
Baroh ki Rot kiba la wan pynpoi mynta ka sngi pynkut hapoh ka Syiem Aitnar kila don haduh 13 tylli, ïa kiba la shna kyrpang da ki dong bapher bapher hapoh ka Raij Jowai kumjuh na ka Seiñ Raij Ummulong, ka seng Khasi Seng Kmie na Shillong. Kine ki rot kila ai ka khubor kiba ïadei bad ka khuid ka suba, koit ka khiah, ka juk Technology bad kiwei de ki khubor jingsneng jingkhraw.
Ha kane ka sngi pynkut ïa ka Behdeiñkhlam la wan ban sakhi lang da u Myntri Rangbah ka Assam u Himanta Biswa Sarma kum u kongsan, nalor u CEM ka Karbi Anglong Autonomous Council u Tuliram Ronghang, u Symbud myntri rangbah ka Jylla u ma Sniawbhalang Dhar, ki myntri sorkar kynthup ïa u ma Lahkmen Rymbui, bah Sanbor Shullai, ma Wailadmiki Shylla, ki MDC, u Deputy Commissioner, u Superintendent of Police ka West Jaiñtia Hills, ki ophisar sorkar, ki nongïalam ka Seiñ Raij Jowai naduh u President ma H. Toi, Secretary ma A. Sumer, ki Dolloi, ki nongshahkhot sngewbha nalor ki paidbah na kylleng kiba la wan sakhi ïa kane ka shad Behdeiñkhlam ha Aitnar.
Ha kane ka lehñiam Behdeiñkhlam na ka liang ki tnad sorkar kiba ïatreilang ki kynthup naduh ka PWD, ka PHE, Police, naduh ka tnad Arts & Culture, Tourism, Planning, North Eastern Council (NEC) Shillong bad kiwei de.
Na ka liang ki nongïalam ka Seiñraij Jowai ki la pynpaw ka jingsngewnguh ïa baroh kiba don bynta ha kane ka lehñiam naduh basdang jong kat haduh bakut jong kane ka sngi, ha kaba la lah ban pyndep ïa ki ñiam ki dustur jong u longshwa manshwa, da ka jingkyrmen skhem ban bha ka rep ka riang bad ban ïoh ïa ka roi ka par ha baroh ki liang.
Haba phai sha ka lehñiam ba khadduh jong kane ka Behdeiñkhlam mynta u snem naduh ka por mynstep ka la don ka Bam Tyngkong ha ïing Langdoh, ka kynting khnong ka Loompyrdi ha ïung Langdoh, ka Sympat ïung, katba haka por nongphai sngi kaba dei ka bynta ba kongsan jong ka lehñiam la pynhiar ïa ka Deiñkhlam, ka Symbood Khnong, ka Khnong Blai bad ki rong ki rup da ka jingsakhi lang jong ki hajar ngut ki nongwan peitkai na kylleng ka Ri Khasi Jaiñtia bad nabar ka jylla.
Katba ha ka por janmiet la don ka Datlawakor hapdeng u Langdoh bad u Sangot Paswet, haka jingïaleh ka kynhun u Langdoh kala long ka nongjop kaba mut ba u kba u khaw un bha sha ka thaiñ Pynthor Wah mynta ka snem.
