U Symbud Myntri Rangbah ka sorkar jylla u ma Sniawbhalang Dhar mynta ka sngi 24 tarik u Kyllalyngkot, 2025 ula plie ïa u mawnongrim jong ka Building ba thymmai ka ‘Khasi-Pnar Secondary School (L.P, U.P & Sec. Section)’ Bakur (Dawki) West Jaiñtia Hills District kaba don ha khappud bad ka Ri Bangladesh.
Ïa ka jingïalang ha kane ka sngi la pynïaid da u ma Alphonsius Khonglah haka jingdonlang u MLA ka thaiñ ma Lahkmen Rymbui uba dei u Chief Adviser ka sorkar jylla, u bah H.M Shangpliang Adviser ka tnad pule puthi ka sorkar, u MLA barim ka thaiñ ma Stephanson Mukhim, u Waheh Shnong ka Bakur ma Wespar Lamin, u SDO ka Amlarem, ki bor pynïaid jong ka skul, ki nonghikai bad ki khynnah skul.
Na ka liang u kongsan ma Sniawbhalang Dhar haba ai jingkren ha kane ka sngi ula pynpaw kiba bun hi ki skul hapoh ka jylla ki don shibun ki jingduna naduh ki nonghikai bad ka jingduna ka (enrolment) ki khynnah skul, hynrei ka sorkar kan ïaleh katba lah ban pynkiew ïa ka pule puthi khamtam ban pynduna ïa ka jingpep skul shiteng por.
Kumba long mynta haduh 2 hajar klur duna ka sorkar ka siew tang naka bynta ka tulop ki nonghikai haka shi snem, kumba 900 klur tang ïa ki Private Sector (Grand in Aid), ki don haduh 14 hajar tylli ki skul hapoh ka jylla kiba ka sorkar ka hap ban peit bad kane ka pyni ïa ka jingtreishitom jong ka sorkar kum ka jylli kaba rit eh. Ula ong ha kine ki 7 snem ka sorkar kala pyrshang katba lah ban pynbiang ïa ki jingdonkam jong ki skul naduh ki Building, ki nonghikai bad ki tiar ba donkam ha ki skul.
Ula ong kiba bun hi ki shim ‘tang ïa ka jingbakla kaba rit ban ïoh kynthoh ïaka sorkar, katba ïa ki kam babha kiba ka sorkar kala dep ban leh ym don pat kiba ai jingïaroh”, ong ma Dhar.
Kum u myntri ba peit ïa ka Urban ula ong ka sorkar kala wanrah ïa ki kam pynroi bapher bapher ha nongbah Shillong, dang ha kane ka 21 tarik u Kyllalyngkot ka sorkar kala sdang ïa ka Secretariat ba thymmai haka jingmang pisa kaba 1200 klur tyngka, na ka liang u Myntri Rangbah ruh ula buh ïa ka budget na ka byntaka Urban Development ka long haduh 5000 klur tam, kine baroh ka long ban lait na ka jingkhapñiah ha ki bynta jong ki jaka sor.
Ula ong na ka bynta ka New Shillong ki projek mynta kiba buh kila sdang ban treikam bad kane kan wanrah ai ka roi ka par lyngba ka jingïoh kam ioh jam jong kiba bun ba lang.
Ula kular ruh ha kaba ïadei bad ka jingthoh Memorandum kaba la aiti ha u mynta ka sngi ula kular ban ïarap katba lah ïa kitei ki jingdonkam jong ka skul ha kine ki khyndiat sngi jong ka jingtreikam.
Ula kular ruh hadien kane ka Election MDC un ïarap pisa haduh 10 lak tyngka bantei ïa ka Auditorium kaba lah ban pyndonkam lang na ka bynta ka skul bad ka shnong, da kaba kyntu ban pynbiang kloi ïaka DPR khnang ba ka kam kan ïaid shaid shaid.
Ïa ki kyntien pdiang sngewbha la ïoh na u ma Luckystar Mannar, General Secretary ka shnong Bakur, la pynphuh shuh shuh ïa kane ka sngi da ki jingrwai bad ki jingshad na ki khynnah skul, katba ïa ki kyntien ai khublei la ïoh na ka Rita Manar Head Teacher LP Section.
