Ka Seng Kur Dkhar Jaintia Hills Central Body ka la shim ia kane ka lad ban pynshai paitbah ha kaba iadei bad ka Kur ka Jait jong ngi, ka Seng Kur Dkhar jong ngi la seng halor ka nongrim khlem da sngewiapher ha ka rukom ngeit Niam, la ïeng skhem na ka bynta ban ia ieid ia thoiñ, ban ia ithuh ithaw para Kur ha baroh kawei ka Ri Jaintia bad ka Ri Khasi kumjuh, ban lait na ka shongsang shongma ha ka shongkha shongman, ban im tip briew tip Blei ban kamai ia ka hok. Kumta ka kur da kawei ka jingmut ka la iai im sngi ha ka ban kyntiew ia ka Kur ka jait ban ia kynduh na ka wei ka shnong sha kawei pat. Te ha kum kane ka por ka Seng Kur Dkhar Jaintia Hills Central Body ka la ioh ia kane ka lad ban ai khublei kyrpang bad iaroh ia ka jingtrei shitom ka Seng Kur Dkhar West Jaintia Hills hapoh ka jingialam u Harwis C Dkhar kum u President, bad u Medistar Dkhar kum u General Secretary ryngkat ki Circle ki Unit ba ki la shimkhia ban tohkit bniah ia ka jingshim kur shim jait u Shidorki na ka Shnong Barato West Jaintia Hills uba la shah bom iap ha ki kti u paitbhur uba la lait phet tuh na ka Jowai District Jail ha kine ki bnai ba la lah, uba la shim Kur shim jait na ka Kur Dkhar jong ngi, da kaba u la ai kur ai jait ia lade da ka Kur Dkhar, hynrei ynda la lah tohkit bniah la lap bad shem ba um dei na ka Kur Dkhar, u dei pynban u Kur u jait Tyngkan,kat kum ka jingleit ia kynduh ka Seng Kur Dkhar “Barato-Mukroh Unit” ia u Secretary Kur Tyngkan Barato West Jaiñtia Hills ba u la kubur ba u Shidorki dei u kur u jait Tyngkan shisha hi.
Bad kumjuh ruh sa kawei ka jingjia ba ka Central Body ka la ai ka jing iaroh bad ka jingkhublei ba kyrpang ia ka Seng Kur Dkhar East Jaintia Hills kaba la trei shitom hapoh ka jingialam u Teras Dkhar kum u President bad u Pdianghun Dkhar kum u General Secretary ryngkat ki Circle, ki Unit kiba la shimkhia ban tohkit bniah ia ka jingshim kur shim jait u Ramesh na ka Shnong Tongseng, (Narpuh) East Jaintia Hills uba la lait im na ki kti u paidbhur, uba lait phet tuh na Jowai District Jail ha kine ki bnai ba la lah, u la shim kur shim jait na ka Kur Dkhar jong ngi, da kaba u la ai Kur ai jait ia lade da ka Kur Dkhar, hynrei ynda la lah tohkit bniah la lap bad shem ba um dei na ka kur ka jait Dkhar.
Te kumta halor kine ki jingshisha bad ka nongrim ba skhem, ka Seng Kur Dkhar Jaintia Hills Central Body ka la pynshai bad pynshisha baroh ar ngut kine ki briew kim dei na ka kur ka jait Dkhar, ngi pynrem jur ia kane ka jingpyndonkam bakla ia ka Kur jong ngi, bad ha kajuh ka por ka Seng Kur Dkhar Jaintia Hills Central Body ka la maham tyngeh ba nangne sha khmat lada don kino kino kiba shim bad pyndonkam bakla ia ka Kur ka jait jong ngi, ngin leh beit da kaba tyngeh kat kum ki kyndon aiñ jong ka Kur, khlem da map shuh.
Shri. Hamjhan H. Dkhar
General Secretary
Seng Kur Dkhar Jaintia Hills
Central Body