Ka ophis jong ka District Hub for Empowerment of Women (DHEW), ha ka jingïatreilang bad ka District Social Welfare, West Jaiñtia Hills, kala rakhe ïa ka International Women’s Dayha ka 6 tarik Lber, 2026 ha Lion Mission Compound, Community Hall, Pohskur, Jowai ha ka phang pdeng “Give to Gain.”
Ha kane ka jingrakhe la kynmaw ruh ïa ka jingdap 11 snem jong ka prokram Beti Bachao Beti Padhao, kaba pynskhem biang ïa ka jingangnud ban kyntiew ïa ka jingïada, ka pule puthi bad ka jingpynkup bor ïa ki khynnah kynthei.
Ka District Social Welfare Officer, Smt. Y. Najiar, kala pdiang sngewbha ïa baroh kiba wan iashim bynta ha kane ka jingïalang bad ka la ban jur halor ka jingdonkam ban rakhe ïa ka International Women’s Day (IWD).
Ka District School Education Officer, Dr. (Mrs.) Wa I Sa Sumer, kala batai ïa ka jingdonkam ban pynkup bor ïa ki kynthei lyngba ka pule puthi. Kala ong ba ka pule puthi ka dei ka atiar kaba khlaiñ kaba iarap ïa ki kynthei ha kiba ki liang jong ka jingim. Ka la kyntu ïa ki kynthei bad ki samla kynthei ban bteng ïa ka pule puthi bad ka jinghikai ïa ki sap treikam khnang ba kin lah ban ïeng ha la ki jong ki kjat bad ban noh synñiang sha ka imlang sahlang.
Ka Chief Judicial Magistrate cum Secretary DLSA, Smt. D. Kharshiing (MJS), kala kren halor ka jingdonkam jong ka jingtip ïa ka aiñ bad ka jingïoh jingïarap na ka aiñ. Kala batai ba ka District Legal Services Authority (DLSA), ka trei ban ai jingtip bad jingïarap ha ka liang ka aiñ ïa ki briew kiba donkam jingïarap, kynthup ïa ki kynthei bad ki khynnah. Kala pynshai ruh khyndiat ïa ka histori jong ka International Women’s Day bad ka jingïaid lynti jong ka jingïakhih ha ka pyrthei na ka bynta ka hok jong ki kynthei.
Kum shi bynta jong ka jingrakhe, la pynkup burom ïa ki seng kiba ïalam da ki kynthei, kum ka jingïaroh ïa ka jingtrei shitom jong ki ha ka ban kyntiew ïa ka roi ka par jong ka imlang sahlang, ka bha ka miat ha ka imlang sahlang.
