Kane ka dei ka jingthoh kaba la phah na kiba ha ïing jong ine i lanot ryngkat bad ka Seng Kur Shylla Niawkmai; la print ia ka kumba ka long (tang ia kyrteng jong i khunlung la buhrieh):-
“Na ka ïing ka sem jong kawei na ki khunlung kynthei kaba dei ka lanot bala duh noh iala ka kjat ka diang na ka jingbakla injek, na ka shnong Niawkmai West Jaintia, – ka 10.05.2023 kane ka khunlung ka don jingshit malu mala, kumta ka kmie jong ka, ka la kit ialam shim dawai na ka Secred Heart Health Centre Sahsniang, ki sister ki la ai injection ia ita i khun jong ngi, bad ngi la leit phai noh sha ïing sha Niawkmai, bad katto katne por ha ka juh ka sngi ngi la iohi ba kata ka jaka ba ki ai injection ia ka, ka la pher bad iong ka kjat mar kumta hi ngi la leit pyni biang sha ka Sister ba ai injection sha Sahsniang, te ka ong ym lei lei yn nai leit sha hospital, na ka liang jong ngi kiba ha ïing ngim sngewhun namar la i pher kata ka jaka ai injection bad ngi la leit ialam sha Dr. Norman Tunnel Hostipal Jowai ha kata hi ka sngi, na ka liang jong ka hospital kim lah shuh ban sumar kumta ki la refer sha Shillong bad ngi la leit sha Nazareth Hospital hangne ruh kila ong kim lah shuh ban sumar ki phah ia ngi sha NEIGRIHMS Mawdiangdiang Shillong. Hangne pat ki Doctor ki ong hap ot noh ia ka kjat, ha ka 13.05. 2023 ki don lang ki sister na ka Sacred Heart Health Centre Sahsniang bad kita ki sister ki ong ia ngi ban rah sha Guahati sha hospital ba kham bha (Appolo Hospital Guahati Assam). Hangne ha Appolo Hospital ruh ki ong ha hap ot hi ia ka kjat, te ki ot noh ia ka kjat ha ka 20.05.2023. Naduh ba ngi don ha ka jingsumar ha kino kino ki hospital kita ki sister jong ka Sacred Heart Health Centre Sahsniang ki don lang bad ngi bad ki ong wat sngewsih ngin kit khlieh ngin ia don lang bad phi ryngkat, bad ki la kular ruh ba kin phah skul kin pynsumar ia ka kjat ba ot katba donkam, kumta ha ka 04.06. 2023 ngi la leit ban pynshisha ia kane ka jingkular jong ki sister ryngkat bad i President Rangbah Ka Seng Kur Shylla Khasi, Jaintia, Shri. P. Shylla jong ngi bad kumjuh kiba ha ïing ha sem. Ki sister ki la kular ban phah skul bad ban ai ia ka artificial kjat kat kumba iaid ka rta jong ka khun jong ngi. Hadien ba lah iadep kren bha shaphang kane ngi lah shna ia ka agreement hynrei kim shym treh shuh ban sign iaka agreement te ki khot ia kren biang ia ngi ha ka 20.06.2023 ha kata ka jingkren ryngkat bad ki phadar bad sister ki la kyntait ia ka jingkular jong ki bad u Phadar Manbha Pakem u la kren tohmet bad u la kynnoh ruh ia ngi ba ngi la shim kabu halor kane ka jingjia ia ka khun jong ngi bad u la phah ia ngi ban ai ia ki da ka case. Hynrei na ka liang jong ngi, ngi sngew phylla ban iohi bad ban ioh sngew ba kat u Phadar ban kren ki kyntien pynmong ia ka ïing ka sem jong ngi kiba la mad ia ka jingjynjar bad um don jingsngew halor ka jingjia ia i bapli i khun jong ngi kaba la duh ia ka kjat bad long disability baroh shi rta tang namar ba ki bakla ban ai injection iaka. Na ka liang jong ngi ka ïing ka sem bad ka Seng Kur Shylla Niawkmai ngi pynrem jur ia kane ka jingkren tohmet jong une u Phadar Manbha Pakem ia ngi ka ïing ka sem bad ia u President ha kato ka sngi”.