(Da u M.M.Thaiang) –
Haba pule na ka jingthoh Baible la ong haba U Jisu u la mih na shnong Bethania sha Jerusalem, ki paidbah Ju (Jiw) ha kata ka por ki da ia risa kmen ban pdiang burom ia u (Jisu) kum u Syiem, u Kynrad jong ki. Shuh shuh ki da risa iaroh ia u kum U Messaiah lane kum Uta uba ki la khmih lynti ban wan ban pynim ia ki. Ha kane ka sngi ba u wan rung ha Nongbah Jerusalem, ki paidbah ki la dap da ka jingkmen bad da kaba rwai iaroh “Hossana Hossana”, hynrei pat tang hadien saw sngi, kiba bun na kine ki paidbah na ka “Hossana Hossana” ka kylla pat “Sahnarphna Sahnarphna”. Kumno kane ka lah ban long ba kiba bun na kine ki paidbah ki kylla ktien. Ki paidbah Ju ki dei ban kylla ktien khnang ban urlong ia kaba u Jisu u la ju pynbna ktien ha ki Synran jong u kham mynshwa ba Un sa shah shitom bad shah pyniap bad yn mihpat na kaba iap.
U Issaiah, uwei na ki Nongiathuhlypa u bakhraw bun snem shwa ka jingkha ia u Jisu sha kane ka pyrthei lyngba kawei ka Theisotti, u la iohi byrngut byrnget shaphang u Jisu da kaba ong “La pynmong ia u, namar ka jinglehbymhok jong ngi, la shoh la sympat, la pynmong pynmynsaw ia ka met jong u namar ki pop jong ngi, ka jingshah sympat halor ka met jong u na ka bynta ka jingpyniasuk ia ngi, da ka jingmong jong u la pynkoit bad pynim ia ngi”.
U Khrist u dei ban iap (Christ ought to have died) bad haba la mon da U Blei Nongbuh Nongthaw ba u Jisu Khrist, u khun ba marwei jong u ba u dei ban iap ban pynim ia ki briew ym don bor pyrthei kaba lah ban khang ia u Jisu na ka jingshah pyniap.
U Pontius Pilatus, u briew uba don ka bor bad ka iktiar ban pynlait im iano iano lane ban phah pyniap, hadien ba u la tohkit sani bha markhmat bad u Jisu, um shem daw eiei ba u Jisu un shah pynshitom bad ban shah sahnarphna haduh ban da iap thadrong halor ka Diengphna ha lum Kalbari, pynban haba la mon, la mang da u Blei ba u Jisu u dei ban iap, u Pontius Pilatus um shym la pyllait im ia u Jisu na ka jingshah pyniap. U Pontius Pilatus, ha ka jaka ban pynlait im ia u Jisu, u saitkti pynban ba um don bynta eiei ha kaba pynshitom bein bad pyniap ia u Jisu da kaba sdien iap halor ka Diengphna. Balei u Pontius Pilatus um shym la pyndonkam iala ka bor ban pynlait im ia u Jisu haba u la shem ba u Jisu u long u briew uba bha, u bym don jingthohbria eiei ha ka jingim jong u lane haba u (Pontius Pilatus) um shem daw eiei ba u Jisu u dei ban shah pyniap.
Ha ki briew kiba pule bniah ia ka Baible, ki ong ba ia ka jingshah pynshitom bein bad shah pyniap ia u Jisu da kaba sdien iap halor ka Diengphna kim sngewphylla eiei naba ki jingthoh ha ka Baible ka kren shai ba u Jisu u dei ban shah pynshitom bad shah pyniap na ka byta ka jingpyniasuk ia ki briew bad u Blei.
Haba shim na ka jingphla u Rangbah Shispah bad kito kiba ia donlang bad u (Rangbah shispah) ha lum Kalbari, ki phla ba u Jisu u long da shisha u Khun jong u Blei Uba don ka boor bad ka iktiar.U Jisu ha ka por kaba u dangiaid dangieng kum u Briew bad kum u Blei ha kane ka sla pyrthei, u la pynkoit ia ki briew kiba pang har-rukom, u la pynimat ia kiba matlah, u la pyniaid beit ia kiba dkhoh, u la pynroi ia ki san tylli ki kpu bad ar tylli ki dohkha ktung haduh ban da dap bam ia kumba san hajar ngut ki briew khlem da kheiñ ia ki kynthei ki khynnah, u la beh ia ki ksuid ki khrei kiba long ka tyllongbah jong ki jingsniew baroh, u la pynim ia kiba la iap, u la shah pyniap, u la mihpat na ka jingiap bad uba la jop thiaw ia ka jingiap.
U Jisu ha ka por kaba u dangiaid dang ieng kum u briew bad kum u Blei ha kane ka sla pyrthei ki briew kiba pang kiba shitom ki wan sha u bad u la pynkoit ia ki bad haba u la shah pyniap u la mihpat na ka jingiap bad kiew sha bneng da ki jingmong bad ka jingiap jong u la pynkoit ia ki briew kiba kyrpad ia u.
U Jisu u ba don kat kane ka bor bad ka iktiar lada u kwah ban lait na ka jingshah pynshitom beiñ bad na ka jingshah pyniap ha ki briew u lah ban pyllait im ialade da kaba suk bad da kaba jem eh pynban um shym la pynibor eiei naba la thoh ba u Jisu Khrist u dei ban iap (Christ ought to have died) kum u langsait pap na ka bynta u khun bynriew kiba shaniah bad ngeit ha u kum u Blei, u nongpynim, u nongiasaid, u ksiang jong ki ha ka jingiadei jong ki bad u Blei.
La nangpynskhem shuh shuh ia kane ka jing ong ba u Jisu Khrist u dei ban iap da u Iaonnis Babtist kaba ong. “Ha khmih u khun langbrpot jong u Blei uba wan ban kitnoh ia ki pap ki sang jong ka pyrthei” U langsait pap um lah ban sait pap ia u khun bynriew lymda um shah pyniap.
U Lukas uwei na ki nongthoh ia ka khubor ba bha (Gospel) u Jisu Khrist ha ka jingthoh jong u, u la thoh ia kane ki kyntien “u khun u briew un iap kumba la rai u Blei “Nangta u Ioannis Apostol uwei na ki synran uba u Jisu u ieid eh, uba la shaniah ha ka shadem jong u Jisu ha ka miet jingkhawai kaba khadduh, uba la don ha kjat jong ka dienphna ha ka sngi ba iap u Jisuu kdew ia kine ki kyntien “ka jingieid kaba khraw tam ba u briew u lah ban don na ka bynta ki lok jong u ka long ban aiti iala ka jingim na ka bynta jong ki”.
Shuh shuh u Lukas ha ka jingthoh jong u, u ong” Ki arngut ki synran jong u Jisu bad uwei pat u briew kiba dang leit jingleit na Jerusalem sha Emmaus ha lynti ki ia kren para maki sha phang bun kiei kiei kiba la jia ha Jerusalem. Une u briew uba ia leit lang bad ki haba u ioh sngew ba kine ki arngut ki synran jong u Jisu, ki ia kren ia ka jingjia ia u Jisu ba u la shah pyniap da ka jingpyniap sdien halor ka diengphna.
U la kylli ia kita ki synran “Hato kam shym la dei ia u Jisu, u Messaiah ba un shah ia kita kiei kiei bad kumta un rung sha ka burom ? Nangta u Lukas ha ka jingthoh jong u (Gospel) u kdew ia kine ki kyntien “ka jingshah lehbeiñ, ka jingshah pynshitom bad ka jingshah pyniap u Jisu ka long ka dak ba u Blei lyngba u khun jong u Jisu Khrist, u la siewspah ia u khun bynriew. La nangpynskhem shuh shuh ia katai ka jing ong kaba la kdew haneng da ki kyntien jong u Petrus (Peter) u synran uba rangbah tam u Jisu kaba ong” U Jisu u la siewspah ia u khun bynriew ym da ka ksiar, ka rupa ne da ka mar ka mata ki bym don eiei, hynrei da ka snam u Jisu khrist da ka jingiap jong u.
Haba pynlum lang na ki jingthoh Baible kiba kren shaphang ka jingim jong u Jisu Khrist bad ka jingiap jong u ha kata ka sngi “Good Friday” ki briew kim sngew phylla eiei naba ka jingthoh ka kdew ba u Jisu Khrist u dei ban shah shitom bad shah pyniap ban siew spah ia u khun bynriew bad ia baroh kito kiba ngeit bad kiba nud ia ka jinghikai jong u.
Ka jingiap u Jisu Khrist ia ka jingiap ka long ka jingjop ia u ksuid u khrei uba long ka tynrai bad ka tyllong ka pap ka sang bad ki jingsniew baroh.