Haba dang sah sa tang shibnai ban pynlong ïa ka elekshon sha ki ar tylli ki Autonomous District Council ha Meghalaya, ka Bharatiya Janata Party (BJP) ha ka sngi Thohdieng ka la pynbna ïa ka thup kyrteng ba nyngkong eh jong ki kyrtong na ka bynta ka jingthep vote ka ban long ha ka 21 tarik u February 2025.
Ka Party kala pynbna ïa ki 14 ngut ki kyrtong sha ka Khasi Hills Autonomous District Council (KHADC) bad lai ngut na ka bynta ka Jaintia Hills Autonomous District Council.
Ha kane ka sngi u Vice President ka BJP ka jylla u Khrawboklang Basaiawmoit u la pyllait paidbah ia ki kyrteng jong ki kyrtong. Na ka bynta ka KHADC, ka seng ka la pynieng ia u bah Himanta Timung na ka bynta ka Jirang, u Manin Raja na ka bynta ka Nongpoh, u Bah Hopingstone Marsharing na Mawhati, bad u Brighstarfield Khongwir na Umsning. U bah Elvisstar Kharbudon un mihkhmat ia ka Langkyrdem-Laitkroh, katba ia u Councellor Mukhim la jied na ka bynta ka Mawkynrew, bad ia u Ebren Khongthah na ka bynta ka Nongshken. Ha kane ka jingiakhun yn ia khun na Nongthymmai u Fairlock D. Ryngksai, u Kynsaibor Lyngdoh na Malki-Laitumkhrah, ka Daniella Nonglait na Mawlai, bad u Lewis Janong Sooting na Langrin. U bah Dimandar Lyngdoh u la shah pynïalehkai na ka bynta ka Nongstoin, u Dominic Wahlang na ka bynta ka Rambrai-Jyrngam, bad u Roland Mawsor na ka bynta ka Mawshynrut.
Na ka bynta ka JHADC u bah Heimonmitre Phawa un iakhun na Jowai South, u Bah Manbha Lyngdoh na Muthlong Sohkympor, bad u bah Shanbor Rymbai na Musniang Rangad.
U State General Secretary ka BJP u Wankitbok Pohshna u la pynpaw ïa ka jingshaniah ha ka jingpynkhreh jong ka party bad pynpaw ruh ba ka BJP ka don ka jingkyrmen ban ïoh ïa ki jingmih kaba khlaiñ ha kane ka elekshon District Council ban wan.
