Ka Jaiñtia Body Building & Fitness Association (JBB&FA) kan pynlong biang ïa ka rynsan pyni dohksah ba heh duh ha Nongbah Jowai kaba la tip kum ka Mr. Ironman Amateur 2024, “4th All Meghalaya Amateur Body Building Championship” ka ban long haka 14 tarik u Nailur sngi (Saitjaiñ) ha District Library Auditorium Mynthong, Jowai.
Lyngba kane ka rynsan kan plie lad ïa ki khun samla ka Ri-Lum Jaiñtia ba kin pynpaw pyrthei ïa ka rukom pynwan dur jong ki ïa ki dohksah. Na ka liang JBB&FA kan sa sam ruh ïa ki khusnam (Award) sha ki nongjop ha ryngkat ka song pisa bad ki Syrnod da ka jingithuh ka Meghalaya Body Building & Fitness Association bad ka World Fitness Federation (WFF).
Ha kane ka jingïakop Mr. Ironman Amateur 2024 ha Jowai ki kynthup ïa ka Men’s Body Building, Men’s Physique, Women’s Fitness bad ka Denim Jeans Model.
Ka samla Sawakani Lakiang kaba jop ïa ka Ms. India 2023 kan long kum ka Guest Posers. La pyntip ba ka dor jong ki Ticket na ka bynta ki paidbah kiba wan sakhi, ki lah ban ïoh ha katei hi ka sngi haka jaka ba pynlong ïa kane ka rynsan kiba long 1) Donors Card Rs.500 bad 2) Executive Class Rs.200 tyngka.
Naka liang u Samla Yoosar Kynjing uba dei u President ka Jaiñtia Body Building & Fitness Association, ula khot bad wer ïa ki nongshong shnong ka Ri-Lum Jaiñtia ban wan shakhi ïa kane ka rynsan pyni dohksah kaba heh duh hapoh Jowai bad haka juh ka por ka long ruh kum ka jingai mynsiem ïa ki khun samla kiba dei na kane hi ka thaiñ ki ban ïashim bynta ha kane ka rynsan.
Nangne kiba jop ïa ka Mr. Ironman Amateur 2024 kin ïoh lad ban mih khmat ïa ka jylla ha ki jingïakop bapher bapher hapoh ka Ri.
Ula ïathuh ruh ba ka jingpynlong ïa kane ka rynsan ka long ruh kum shi bynta ban rakhe ïa ka jingdap 4 snem jong ka jingïaid lynti ka Jaiñtia Body Building & Fitness Association (JBB&FA), Jowai ha ka jingshakri jong ka.
