Hadien ka jingap bad khmih lynti jong ki paid ieit phutbol khamtam ia ki rangialehkai na kane ka jylla, ka Shillong Sports Association (SSA) ka la pynbna paidbah ba kan sdang noh ia ka lympung Shillong Premier League (SPL) na ka bynta ka aiom 2024 naduh ka 16 tarik mynta u bnai ha madan First Ground, SSA Stadium, Polo, Shillong.
Kum ban shu pynkynmaw ia ka nam lahduh jong kane ka lympung ha u snem 2023 la ioh ban rah da ka Mawlai SC katba ka Rangdajied FC ka la ioh ia ka kyrdan ba ar. Ha ka samoi 2023 tang 8 tylli ki kynhun na kylleng ka Sor Shillong ki la ioh ban don bynta ha kane ka lympung kaba heh hynrei hadien ka jingrai ba thymmai jong ka SSA la kyntiew na ka bynta 10 tylli ki kynhun (teams). Ki ar tylli ki kynhun kiba la ioh ban rung thymmai sha kane ka samoi ki long ka Nongrim Hills SC bad ka Laitkor SC.
U Bah Banteidor Lyngdoh uba dei ruh u President jong ka SSA, u la pynbna paidbah ba ka song pisa sha ki nongjop mynta ka samoi ka la kiew ar shah, kata 6 lak na ka bynta ka Lahduh bad 3 lak na ka bynta ka kynhun kaba ioh ia ka kyrdan ba ar.
Nalor kata ban kyntiew shuh shuh ia ka jingialehkai bad ka jingmyntoi ia ki nongkyrshan, la mynjur ban pynialehkai mynmiet da kaba pyndonkam da ki Floodlight. Kane kan wanrah ia ka jingmyntoi ia ki nongialehkai bad khamtam ia ki nongkyrshan kiba jngai bad kiba hap ban pyndep shwa ia ki kam mynsngi.