Ka Employment Monitoring Cell ka KSU EJHDU hapoh ka jingialam u Samla Shaniahskhem Dkhar (Chairman) bad u Samla Cherity Suja Secretary mynta ka sngi ka 10 tarik u Risaw 2024 ka la leit buh bad ai jingmut ia 17 tylli ki mat ban saiñdur thymmai iaka District Selection Committee ka District.
Ka nongrim jong ka jingleit ai jingmut bad dawa ka long ban don ka jingthung kam thung jam ba khuid wat ha ki District ruh lyngba ka DSC kaba dei ka statutory body ban leh iaki recruitment ha ki department ba pher bapher jong ka sorkar jylla hapoh ka distrik.
Ka seng ka la ioh ban pynsngew iakine ki 17 tylli ki mat kiba kynthup kaba nyngkong ka long naduh ka jingjied iaki dkhot ka DSC ba kim dei ban don liang ne kim dei ban shah liang bad ba ki dkhot ka DSC hi ki dei ban don noh ka qualification kaba biang. Kaba ar ka long halor ka jingpyllait paidbah iaki jingdon jingem ki dkhot ka DSC ba la shah thung bad kaba lai ka long ba ki nong aplai lane ki candidate ki dei ban long ki trai shnong ka jylla Meghalaya bad kiba la pliah ban kren iaka ktien kmie bad ktien Khasi ha la ki jong ki District. Kaba saw ka long ban pynduh noh iaka thung kam lyngba ka Adhoc, Casual appointment bad ruh ka contractual halor ka nongrim na kum kine ki jait thung kam ka long kaba pyrshah iaka jingbthah ka Department of Personal Reform Govt of Meghalaya. Kaba san ka long ban pynduh shisyndon iaka personal interview ha ki post Grade B C bad D halor ka nongrim ba ka jingrung tuh lane thung kam bym khuid ka jur bha lyngba ka personal interview. Katba kaba hynriew ka long halor ban pyni paidbah iaki marks jong ki nong apply kam halor ka nongrim ban wanrah iaka jingkhuid jingsuba haka thungkam bad ruh khamtam ba ka DSC hi kan lait na ka jingshah kynnoh. Kaba hynniew ka long halor ki roll number jong ki nongthep kam kim dei ban kylla hapdeng ka recruitment. Kaba phra ka long halor ban ai da ki carbon copy jong ki OMR sheet sha ki candidate. Kaba khyndai ban pyllait paidbah iaki answer key hadein ka exam hapoh ka por ba biang ba ki nongthep kam kin lah ban nujor bad aireng iaka answer key. Ka mat ba shiphew ka long halor ba ka jingthep kam lane recruitment yn pyndep hapoh 6 bnai naduh ba lah advertise iaki post. Kaba khatwei ban pynduh shisyndon iaka Personal interview haki post grade B,C bad D. Kaba khatar ka long halor ban ai iaka kaiphod lane annual report daka DSC. Kaba khatlai ba ki question papers kin hap long confidential ban lait na ka leakage ki exam question paper. Kaba khatsaw ba ka DSC ka dei ban don iaka Grievances Cell khnang ba ki candidate kin lah ban complaint. Kaba khatsan ba ha ki por ban wan ki exam dei ban leh noh daka CBT Computer Based Test. Kaba khat hynriew ba haka por ba thoh exam ka internet services dei ban pynduh bad kaba khat hynñiew ka long ba dei ban buh iaki CCTV camera hapoh ki exam hall.Kine ki long ki jingai jingmut na ka seng sha u Chairman ka DSC .
Na ka liang u Chairman u la ong ba ia ki ba lah ban leh ha District level kin shim ki jingmut jong ka seng bad ki bym don pat ha ka bor jong u yn phah pat sha ka sorkar jylla lyngba ka Personal Department.