U Myntri Rangbah ka sorkar jylla u Conrad K. Sangma ula pyntip ba ka sorkar kala pyllait ïa ka bhah pisa sha ka Jaiñtia Hills Autonomous District Council (JHADC) kaba la kot haduh T.20 klur tyngka, na ka bynta ban siew ïa ka tulop jong ki nongtrei ka Council.
Ïa kane u Myntri Rangbah ula pynsngew sha ki lad pathai khubor hadien ka jingïakynduh bad ki MDC ka liang synshar ka JHADC mynta ka sngi ha CTC Orchid Inn Thadlaskeiñ. Shuh shuh ula pyntip ïa ka pisa kaba T.19 Klur tyngka yn sa pyllait noh hapoh kine ki 3 taïew ban wan kum ka lad ban ai jingïarap ïa ka Council.
Ha ka jingïakynduh jong u bad ki MDC mynta ka sngi kila don shibun ki jingïakren ban pynbeit ïa ki jingeh jong ka Council naduh ka rukom treikam, ka rukom pynïoh pisa bad kiwei de.
Da kaba u ong ha kine ki sngi ban wan kin pynlong ïa ka jingïakynduh lang ha kaba u Symbud Myntri ka jylla un sa khot ïa kane ha ryngkat ka ‘Finance Level’ khnang ba ka rukom bhah pisa kan long kaba ïaid beit ïaid ryntih.
Haba kylli la ka don ka jingpynbha ïa ka rukom bhah pisa sha ka council hapoh ka por bala buh, ula ong ba ïa kane yn sa peit bniah namar kam dei kaba suk bad kaba kongsan ka dei ban pynïaid shakhmat ïa ka rukom treikam jong ka Council.