Ka jingialehkai jong ka 1st Division Football Tournament 2022 jong ka West Jaintia District Sports Association, kaba la ai nam ka 10th U Chatister Kharkongor Memorial Trophy, kaba dei ruh shi bynta na ka jingrakhe Golden Jubilee jong ka Association mynta u snem, kala poi sha ka Final ha kane ka 19 tarik mynta u bnai.
Ki kynhun kiba la poi sha ka Final ki long ka Sailung Ialong SC pyrshah ia ka Mukhlaraij SC. Ia kane ka jingiakhun yn pynlong ha ka por 1:00 PM, ha Kiang Nangbah Stadium, Ladthalaboh Dongmihsngi, Jowai.
U kongsan ha kane ka sngi un dei u bah Finely Pariat, u Hony, General Secretary ka Meghalaya State Olympic Association, Shillong.
Kumta na ka liang ka WJDSA lyngba u Hony. General Secretary ma L. Laloo, ka khot ka wer ia baroh ki paid riew ieit Football ban wan sakhi lang ia kane ka jingiakhun Final hapdeng kitei ki ar tylli ki kynhun.
Kumban shu pynkynmaw ba ka Sailung Ialong kala ioh rung sha ka Final hadien ba ka la pynliem ia ka Nangbah Iawmusiang da 9-0 kol, katba ka Mukhlaraij SC kala poi sha ka Final hadien ba kala pynliem ia ka Moosyiem Shangpung da 2-0 kol.