Ka company Star Cement lyngba ka tnat CSR jong ka mynta ka sngi ka la pynlong ïa ka prokram sam dawai ei sha ki paidbah jong ka thaiñ Narpuh ha kaba ki la don haduh 190 ki nongshong shnong jong ka thaiñ kila ïoh jingmyntoi na kane ka prokram sam dawai.
Ïa kane ka prokram sam dawai ei la pynlong ha PHC Lumshnong ha kaba la wan ban ïadonlang ki ar ngut ki doctor kiba na Nemcare Hospital Guahati kiba kynthup ïa ka Dr Smnity Burgohain Das bad ka Dr Shakustala Mohanta, Gynologist Specialist bad uwei na Downtown Hospital Guahati, u Dr Jeumon Talukdar, uba dei u ENT ban peit bad thoh dawai ïa kito kiba wan shim dawai.
La ïadonlang ruh u Dr Ngaidlang Phyllei uba dei u Medical Incharge jong ka PHC Lumshnong, ki nongtrei jong ka PHC Lumshnong bad ka kynhun jong ka CSR Star Cement ka la ai ka jingīatreilang ha kaba pynlong ïa kane ka prokram kaba jop.
Ha kane ka prokram la leh ruh ïa ki test kum ka Thyriod Test bad ka Blood Sugar Test ba la pyniaid da ka kynhun kaba na Pathkind Shillong.
U Manager CSR Star Cement, u Kingshok K. Borah haba ai jingkren u la ong ba ka tnat ka la ju pynlong man ka por ïa kaba kum kane ka prokram sam dawai ei sha ki paidbah bad kumjuh ruh sha ki paidbah kiba ha ki shnong ba khappud bad ka ri bangladesh bad ka la long ka jingkyrkhu bad jingmyntoi shibun ïa ki paidbah, u la ong ruh ba ka tnat kan sa pynlong biang ïa kane ka prokram sam dawai ei sa ha ka sngi ba bud, ha shnong Brichyrnot ha kaba u Doctor jong ka Lumshnong PHC, u Dr Ngaidlang Phyllei un sa leit ban peit bad examin ïa kiba wan ban shim dawai.
Ki nongshong shnong naduh Shymplong, Sonapur, Thangskai, Umlong, Tongseng bad kiwei kiwei ki shnong jong ka thaiñ Narpuh ki la wan ban shim dawai ei bad ïoh jingmyntoi na kane ka Medical Camp jong ka Star Cement Company.
