Ka lympung ïalehkai phutbol jong ka kyrdan 1st Division bala pynïaid da ka East Jaiñtia Hills District Football Association kaba la long ha kane ka sngi Saitjaiñ 19 tarik u Risaw ha madan Artificial Turf, Diengshynrum, Khliehriat.
Haba phai sha ka jingïakhun mynta ka sngi ka kynhun ïalehkai jong ka Shilliang Umshong SC kala pynliem da 1-0 kol ïa ka R.Wahshnong SC, ïa katei ka shikol na ka Shilliang Umshong SC la thep da u Lhunmingthang Thauthang haka minit ba 71.
Ha ka jingïakhun kaba ar hapdeng ka Iatyllilang SC Hingaria pyrshah ïa ka Bataw YWSC kila poi sha ka jingïakhiad da mar shikol (1-1), ïa ka kol na ka Iatyllilang SC Hingaria la thep da u Deibormi Lamin haka minit ba 72. Katba na ka liang ka Bataw YWSC la thep da u Jesper Lamare haka minit ba 10.
Ka jingïakhun ha ka sngi nyngkong 21 tarik u Risaw kan long hapdeng ka Rangad SC pyrshah ïa ka Jalyiah UTD SC ha ka por 12 baje mynsngi, katba ka Byndihati CSC kan ïakhun pyrshah ïa ka Moolamanoh SC ha ka por 2 shiteng nohphai sngi.
