Ka Elekshon MDC mynta u snem kan long kaba kham kyrpang bad kham phylla ha kaba yn mih madan 2 ngut ki nongthoh khubor ba la paw bad ba la rim bha ha ka jylla, kata u Bah Powell Sohkhlet u ban ïakhun na Pariong-Mawthadrishan Constituency bad u Bah R. Monarch Shabong u ban ïakhun na Nongshken Constituency.
U Bah Powell u ban aireng ha kane ka Elekshon na ka seng VPP u la pyndep ia ka jingthep kyrteng mynta ka sngi ha office jong u DC Eastern West Khasi Hills, Mairang ha kaba la synran da ki ba haïing, ki Nongïalam bad ki nongkyrshan kane kynhun. Katba u Bah Shabong u la pyndep ia ka jingthep kyrteng na ka seng Congress ha Pynursla ha ka 31 tarik Kyllalyngkot 2025.
Haba ioh ban iakren bad u Bah Powell u la ong ba hadien ka jingiaid lynti kaba palat 30 snem kum u nongthoh khubor, u la ong ba kaei kaba u la mad bad iohi lyngba kitei ki snem da ka jingioh kabu ban trei ia katei ka kam paidbah, u la ong ba ka jingbym trei hok jong ki MLA bad MDC ha kane ka thaiñ bad ka jylla ka la pynlong ba ka jingsahdien kan roi, ka jingbuhrieh ia ki skhim bapher bapher ka pynlong ruh ba ki shnong bad ki sor ban sah khongreng. U la ong lyngba ka jingiohi ia kine ki jingeh bad ka jinglehsting ki Nongïalam, ka pynlong ia u ban mih madan mynta u snem namar kadei tang lyngba ka jylli ha ka saiñ hima kaba lah ban pynkylla dur ia ka jingsynshar hok. U la kdew ruh ba kum u Nongthoh khubor u la ialehkai kumno ban wanrah sha ki paidbah ia ka jingbym leh hok ki Nongïalam ha ka jylla hynrei ka jaka kaba u don kam lah than ban pynkhih ia kiba don ha ka bor, kumta kane ka lynti kaba u jied mynta lyngba ka seng VPP kan wanrah ia ka jingkylla lada ki paidbah ki ai ia ka jingshaniah.
Khyndiat haba phai pat sha ka jingim bad jingiaid lynti jong u Bah Shabong uba dei ruh u trai jong ka kot khubor Rupang, une u Rangbah uba sah mynta ha Upper Shillong bad u ba dei ruh u trai shnong na Umñiuh Tmar ym tang ba u la trei kum u nongthoh khubor hynrei u la trei ruh shibun ki kam shakri paidbah, kata kum u Sirdar ka Umñiuh Tmar Elaka ha ka snem 1989. Hadien ka jingmad ia shibun ki jingshaniah na ki paidbah u la sdang ban ïakhun ia ka Elekshon MDC ha u snem 1999 na la ka jong ka constituency bad liem da ka said ha u Bah K.K. Dkhar kyrtong ka Congress.
Ha kaba iadei bad ka thong ban ïakhun ia kane ka Elekshon MDC, u Bah Shabong u la ong ba jingangnud hi ka long ban pynneh pynsah ia ka riti dustur jong ka thaiñ, kata naduh ka ktien ka thylliej, ban pynioh pat ia ka kyndew ka shyiap kaba la shu tuid sha ka Ri Bangladesh khlem Nongrim, ban kyntiew ia ka rep ka riang bad kiwei kiwei.
Ka jingmih madan jong kine ki ‘riew shemphang ha kane ka Elekshon haduh katno kan wanrah ia ka jingkylla lada yn poi sha ka thong namar kine 2 ngut ki dei kiba la ih bha ha ka jingtip, la ka imlang sahlang bad ka saiñ hima. Katno yn kylla dur ka jingpynneh ia ka kolshor riti bad dustur bad kiei ka aiñ kiba yn nang lah ban pynim bad pynduh.