Ka Sorkar Jylla ha ryngkat ka jingiatreilang jong ka Shillong Municipal Board (SMB) ki dang pynkhreh mynta shaid shaid ia ki 2 tylli ki jaka die jingdie na ka bynta ki nongdie madan kiba ju don ha shilynter jong ka lynti kaba na 9-lad shaduh Umsohsun. Kitei ki jaka ki kynthup ia ka jaka ieng kali (Parking Lot) jong ka MUDA bad ka jaka ieng kali kaba don mar pyrshah ia ka SBI, Shillong Branch.
Kum ban shu pynkynmaw, ha ka 3 tarik Naitung, ka Meghalya High Court ka la ai jingbit ia ki nongdie madan ba kin don la ki jong ki kynta ban die jingdie ha 9-Lad, kata ia kaba la buh naduh ka por 12:30 mynsngi haduh 2 baje nohphai sngi bad 7 baje janmiet haduh 9 baje janmiet. Wat hadien katei ka hukum, la iohi mynta ba ka 9-Lad ka khapngiah biang kumba ju long ha kine ki sngi ba lah dep.
Watla ka Sorkar ka dang pynkhreh ia ki jaka ba katto katne ki nongdie madan ki la mynjur, u Bah Paul Lyngdoh uba dei u Myntri ba khmih ia ka Tnad jngohkai pyrthei u la ong ba ha shwa ka 22 tarik mynta u bnai, yn pynkhuid lut phar ia baroh ki nongdie madan ha ka thaiñ 9-Lad. Shuh shuh u la ong ba hadien, katei ka thong, ka Sorkar kan sa iakhun ruh ban pynkhuid ia baroh ki nongdie madan kiba shong pathar ha baroh ki jaka khap sor.
Kumba ka long mynta, ka jingpynkhreh jong ka Sorkar ia ka jaka ba thymmai na ka bynta ki nongdie madan ka la jan dep pura bad tang hadien khyndiat sngi yn pyntreikam noh ia kitei ki jaka. Shuh shuh u Bah Paul u la iathuh ba ia ki briew bad ki kali kiba iaid lyngba katei ka lynti yn shah ban iaid katkum ka por bad yn pynbiang ruh da ki Pass, khnang ba yn pyntikna la ki dei ne em kiba sah ha kitei ki thaiñ bad ym tang katta ban pynduna ia ka jingkhangngiah.
