U Bah Allan Victor Lyngdoh kyrtong jong ka Congress u la wan thep kyrteng ialade ban ïa aireng sha ka elekshon MDC jong ka KHADC mynta ka sngi na Nongthymmai konstitwensi ha ISBT Mawïong.
Haba kren sha ki lad pathai khubor na ka liang u Bah Allan Victor Lyngdoh u la ong ka jingmih shakhmat ban ïakhun ia ka Elekshon ka dei halor 2 tylli ki nongrim ka vote share 25 hajar, 15 hajar ka dei ka vote ki Khasi bad 10 hajar ka dei ka vote jong ki bym dei Khasi bad dei ban tehlakam lada ym lah ban tehlakam kan sa long kum ka General Seat kumba long kiwei ki konstitwensi ka ba don hapoh District Councils.
Kawei pat ka nongrim ka dei halor “ka District Councils ka don ia ka lad ban ai trading license, hynrei dei ban don ia ki aiñ ki kyndon haba issues ne ai kino kino ki trading license ka dei ban don ban ai ia kita ki kam ki jam ka dei ban don kata ka jingiateh kumba 80 percent dei ban ailad shwa ia ki khun samla ka Jylla kiba la don ia kita ki jingnang jingstad, bad kaba sngewsih ka long ha ki snem ba la leit ka jingai trading license ka long shaba palat ngin da peit kum ka star cement kum kiwei kiwei ki karkhana cement kiba bun hi ki post kiba heh ki leit lut sha ki bym dei ki trai Jylla katba ki Khasi jong ngi ki trai muluk ki sar shabar jong kata ka jaka trei ka jong ki, kiba sait tiar kiba leh ki kam ki barit kiba ria ki dei ki Khasi jong ngi kiba bun ki khun samla ki la nang la stad kata ka dei ka nongrim ban mihshakhmat ban ïakhun ia kane ka Elekshon.
Shuh shuh u la ong ka jingkyrmen ka don haba mih shakhmat ban ïakhun ia ka Elekshon ngin shaniah ha u Blei bad lada u Blei u i mon ym don mano mano ba lah ban khang lada u Blei um i mon lada trei shitom katno katno ruh yn ym poi sha ka thong ka jingjop ka shong ha u Blei ba na jrong.
U la bynrap i bah Pyniaid i dei i sitting MDC na Sohryngkham ka jingwan ïakhun na Nongthymmai ka dei ka mon laitluid jong i bad ka dei ka hok jong u no no ruh ban wan shakhmat ban ïakhun ia ka Elekshon na kano kano ka konstitwensi.
Shwa ban pynkut u la ong “Lada dang don i baheh latiplang Kharkongor ngan nym mih ïakhun ia kane ka Elekshon namar ngi dei ki nongkyrshan ba radbah jong i baheh latiplang Kharkongor, ki kam kiba i trei bad ka nam ka burom ki paidbah ki dang ieid haduh mynta ia i baheh latiplang Kharkongor, ngin bud ia ki Diengjat jong i baheh (L) latiplang Kharkongor ki matti jong i bad ngin iaid ryngkat bad u paidbah na ka bynta ka jingbha jong ka konstitwensi.
Haba iadei bad ka jingkyrshan jong i bah Charles Pyngrope MLA jong ka TMC na Nongthymmai na ka liang jong u Bah Allan u la ong ha ki bnai ba la dep ka TMC ha Nongthymmai ngi la khylliap lama bad i Bah Charles Pyngrope i dang don ha TMC bad shimet i ai jingkyrshan pura na ka bynta ka MDC Elekshon sha KHADC.