Shi bynta ban kyntiew ïa ka rukom ai jinghikai ha ki skul kaba long katkum ka juk stad digital, mynta ka sngi Thohdieng 20 tarik ha ka sien ba nyngkong la sam ïa ki 200 tylli ki Computer sha ki 14 tylli ki skul hapoh ka West Jaiñtia Hills District.
Ïa kane ka prokram la pynlong da ka ophis jong u Deputy Commissioner, West Jaiñtia Hills District, Jowai hapoh ka skim Pradaan Mantri Khannij Kshetra Kalyan Yojsna (PMKKKY) ba la bei tyngka da ka District Mineral Foundation (DMF) na ka bynta ki skul Secondary bad Higher Secondary Schools.
Ïa kitei ki Computer la sam sha ki 14 tylli ki skul da u MLA ka Jowai uba dei ruh u Chairman ka MUDA ma Wailadmiki Shylla ha ka jingïalang bala pynlong ha Conference Room jong ka ophis u DC, Jowai.
U ma Wailadmiki Shylla haba ai jingkren ula ban jur halor ka jingdonkam jong ka Digital Literacy ha kum kane ka juk stad mynta. Ula pynpaw ka jingsngewskhem halor kane ka sienjam ba la shim da u Deputy Commissioner ban kyntiew ïa ka pule puthi ki khynnah pule ha ka juk teknoloji.
Shuh shuh u ma Wailadmiki Shylla ula ai khublei ruh ïa u Deputy Commissioner halor ka jingpyrshang jong u ban kyntiew ïa ka rukom ai jinghikai hapoh ka District. Ha ka juh ka por ula pynshlur ïa ki nonghikai ban kin ïasam lem ïa ki jingeh ba ki ïakynduh, na ka bynta ban pynbha ïa ka pule ka puthi.
Na ka liang u Deputy Commissioner ka WJHD u Abhinav Kumar Singh, IAS, ula pyntip ha ka bynta kaba ar, yn pyntreikam ïa rukom ai jinghikai halor ka Microsoft naka bynta uwei u nonghikai jong kawei ka skul. Ha ka juh ka por ula ban jur ban pynbun ïaka jingpynrung kyrteng ha ka subject Computer Science namar kumba long mynta dang duna bha ki samla kiba shim ïa kane ka subject hapoh ka District.
Ki skul kiba ïoh jingmyntoi mynta ka sngi ki kynthup ïa ka Sohkha Government Higher Secondary School, kaba la ïoh pdiang 17 tylli ki Computer. Ka Government Boys’ Higher Secondary School, Jowai kala ïoh 23 tylli. Na ka bynta Kiang Nangbah Higher Secondary School, Jowai 26 tylli.
Ïa ka Government Girls, Higher Secondary Jowai la ai 20 tylli. Ïa ka Jowai Public School Jowai bad ka UPS Sorkar Mowkaiaw & RMSA la ai mar 13 tylli. Ïa ka Shangpung RMSA Secondary School, Jowai RMSA Secondary School, Government Senior Basic & RMSA Higher Secondary School Mynso bad ka Nongtalang Government Secondary School la sam mar 12 tylli ki Computer.
