[Yn khang ia ka Park bad Pynthor Ialong ha kane ka sngi]
Ka Seiñ Raij Ialong sa shisien mynta ka kynti ruh kan pynlong biang ia ka jingkñia Sapet Bneiñ (Sohpet Bneng), kaba long kawei na ki jinglehniam leh rukom jong ki khun ka Raij.
Ia kane ka jingkñia Sapet Bneiñ yn pynlong ha ka 22 tarik mynta u bnai, hapoh ka ’Lawkyntang (Khloo Blai) jong ka shnong Ialong, ha ka lynti ban poi sha ka Park Ialong bad ka Pynthor Ialong. Ka jinglehniam kan sdang naduh ka por 7 baje mynstep haduh ka por 7 baje janmiet. Ha kane ka jinglehniam ym pyndonkam da u Masi ban pyndep ia ka niam ka rukom bad ka kñia ka khriam.
Kumta ha kaba iadei bad kane na ka liang jong u President jong ka Seiñ Raij Ialong u ma Pyrkhat Shylla ula buh ka jingkyrpad ia baroh ki paidbah kiba ju sngewtynnad ban wan shongkai bad iaidkai sha kane ka Park bad kumjuh ruh sha Pynthor Ialong ba kin sngewbha ban sangeh shwa ban wan ha katei ka sngi (22/9/2022) khnang ba kane ka jinglehniam leh rukom kan long kaba iaid beit iaid ryntih khlem kano kano ka jingpynwit pynthut.
