Ka Myntdu Pynthorneiñ Farmers Welfare & Producers Organization, kum shibynta ba ki nongrep Kba kin ïoh myntoi shuh shuh na u Kba symbai u CAU R1, ka la pynlong ïa ka jingïalang bad ki nongrep ka shnong Mukhla kiba la rep ïa une u Kba symbai CAU R1 naduh u snem 2019-2021 ha ki lyngkha ha Mojem bad Myntkhor ka Mukhla Raij. Ha kane ka jingïalang ki nongrep ki la ïoh ban pynphai ïa u Kba symbai trai uba ki la ïoh mar San ser (5kgs) marwei naduh mynshem snem bad mynta ka sngi 05/04 pat la ïoh ban sam thymmai biang sha kiwei pat ki 23 ngut ki nongrep ba kin ïoh myntoi na une u Kba CAU R1.
Ha kane ka jingïalang, la ïoh ïa ka jingkren na u ma Khroo L Pariat Adviser ka seng, uba la wanrah nyngkong ia une u symbai Kba na ka CAU Umiam Ri bhoi District. Ha ka jingkren ka jong u, u la pynpaw ka jingsngewnguh ïa ki nongrep kiba dei shisha ki trai ka meirymaw namar dei na ka jingshitrhem bad jingminot ka jong ki ba man la ka sngi, ba ki briew ba im ha kine ki lum, ki ïoh jingim da kaba koit ba khlaiñ haduh mynta mynne bad u la kyrpad ïa baroh ki nongrep ban nang bteng shuh shuh ïa ka kam rep da u Kba symbai trai ba na shnong la jong bad u la pynshlur ïa ki nongrep ban pyndonkam da ka sboh kaba ju pynmlien da ki longshwa manshwa, khnang ba ki lyngkha ki Pynthor kin nang ïai pynmih ïa shibun u kba u khaw ban im ka jait ka kynja.
Nalor nangta u la kyrpad ïa baroh ki nongshong shnong ban pyndonkam noh da ki pla jain haba leit siew sha ïew sha dukan ban hikai ïa ki khun ban ym bam ïa ki jingbam plastic kiba ym tang ba ki ktah ïa ka bor kynmaw hynrei khamtam ïa ka um ka lyer bad ka khyndew kiba pynim ïa ngi ki briew.
Ha kane ka jingïalang la ïoh ka jingkren na ka Kong Dayoo Ïakai, President All Jaiñtia Muster Roll Workers & Labour Union, sengkmie Jowai. Na ka Kong Malty Suna bad na u Samla Pyntngenlang Kyndait General Secretary MPFW & PO kiba la batai ïa ka rukom ban rep bad ïa ka jingmyntoi ba ki la ïoh na une u Kba symbai CAU R1. Ïa une u Kba symbai la sam San phew ser (50kgs) ha ki arphew lai ngut ki nongrep ka Mukhla Raij.
