U Myntri ka tnad Revenue & Disaster Management, u Bah Kyrmen Shylla, haba kren sha ki ladpathai khubor, u la pyntip ba ka jingpynjulor kaba la jia na ka jinghap u slap ha Garo Hills kadei ka jingjia kaba shyrkhei tam na ki jingjia baroh da kaba kdew ruh ba haduh 15 ngut ki briew ki la khlad ha kane ka jinglynshop ka bor mariang.
"Mynta ka kynti ka jingjia ka la long kaba shyrkhei namar ha ki snem ba la dep ka ju don ka jingjia shah lyngshop ha ki bor mariang hynrei nga la bat 6 snem kum u Myntri ka tnad bad kane ka dei ka sien ba nyngkong ban iohi ia ka jingujor kaba shyrkhei sha ki thaiñ Garo Hills" u la ong.U la bynrap “Nga ai khublei ia u Myntri Rangbah , ki nongmihkhmat jong kine ki thaiñ ki ba la leit ban hiar sha kitei ka jaka ki ba la shah pynjulor, ban ai ka jingiarap ia ki nongshongshnong ka Rilum Garo “.
U myntri u la pyntip ba ki don haduh 246 tylli ki shnong ha kylleng ka thaiñ ki la shah ktah jur, 665 tylli ki ïing ki ba la julor bad 15 ngut ki briew ki la duh ei ïa la ka jong ka jingim bad 6 ngut ki la mynsaw ha kine ki jingjia.“Ha west Garo Hills District ka jingdon jong ki shnong kiba shah ktah ki long 132 tylli , na kine 93 tylli ki ïing ki la shah pynjulor bad 5 ngut ki briew ki la duh ei ia la ka jong ka jingim bad lai ngut ki la mynsaw” u la ong.
"Ha south Garo Hills 79 tylli ki shnong kiba shah ktah 244 tylli ki ïing ki la shah pynjulor bad 7 ngut ki la duh ei ia la ka jong ka jingim, katba ka East Garo hills 12 tylli ki shnong ki la shah ktah, kawei ka ïing ka la shah pynjulor bad 3 tylli ki jingim ki la duh bad 3 ngut ki la mynsaw" u la bynrap.