Ka Jowai Presbyterian Higher Secondary School, Jowai mynta ka sngi 7 tarik u Jylliew, 2024 kala pynhap pyrda ïaka jingrakhe dap 25 snem (Silver Jubilee) haka jingïaid lynti ban ai ïaka jingnang jingstad ïaki khynnah skul.
Ha kane ka sngi u MP ka Rajya Sabha u Dr. W R. Kharlukhi ula long kum u kongsan, haka jingdonlang u MLA ka Jowai ma Wailaimiki Shylla kum u symbud kongsan, u Dolloi ka Elaka Jowai ma Puramon Kynjing, u Chairman ka Silver Jubilee Rev. C.L. Laloo, ki Pastor, Ki Tymmen Basan nalor ki kmie ki kpa, ki khynnah skul bad kiba la shah khot sngewbha.
Ka Headmaster jong ka skul ka kong Yoodamika Lytan kala pynsngew ïaka History jong ka skul kaba la ïaid lynti naduh u snem 1999, ha kaba ka skul naduh ki Headmaster bad ki Nonghikai bala dep kila noh synñiang shibun eh haka liang ka pule puthi. Ha ka juh ka por kala aiti kumjuh ïa ka Memorandum ha u Kongsan bad ha u Symbud kongsan jong kane ka sngi.
U kongsan jong kane ka sngi Dr. W R. Kharlukhi haka jingkren ula ai khublei ïaka jingdap 25 snem jong kane ka skul Presbyterian, da kaba kyntu jur ban buh hakhmat eh ïa U Blei khnang ba kino kino ki jingthmu kin long kiba jop, ula ong baroh ki briew ki long kiba pop hynrei lyngba ka jingshah jong u Jisu Khrish halor ka Diengphna la pynim biang ïa u khun bynriew.
Ula pynsngew ruh halor ka jingieit bah jong u Blei ïa kane ka Ri bad ka jait bynriew kaba dap kyrhai da ki jingitynnad haka mei mariang, kum ki jaitbynriew ‘ngi dei ban kheit kor bha ïa kane’, ula kitbok kitrwiang ïa ki nongïalam jong ka skul, ki nonghikai bad ki khynnah skul ban kin ïaid ryngkat bad U Blei na ka bynta ka lawei ha ka jingim. Ha ka juh ka por ula ai jingïarap ruh haduh 10 lak ïaka skul ban pynshna ïa ka Addl. Classroom.
Naka liang u MLA ma Wailadmiki Shylla ula ai ka jingïaroh khamtam ïa kiba donkti ban seng ïa kane ka sngi naduh ba sdang, kum u MLA un wad ki lad ki lynti halor ka Memorandum bala aiti ban pynïoh ïa ki jingdonkam jong ka skul.
Ula kular ban don ryngkat bad ka skul ha kino kino ki kam ba ka skul ka donkam ïa u, shuh shuh ula pynsngew ïaki kam ba bha jong ka sorkar kaba la ïarap ban siew tulop ïaki nonghikai ka Thomas Jones Synod College bad jingïarap ban pynheh ïaki klas room ha Kiang Nangbah Govt. College ban ïoh pdiang khambun ki samla pule ka Ri-Lum Jaiñtia.
Shuh shuh ula ong ‘ka kam nonghikai ka long kaba kyntang eh ha ka jingshakri bad dei maki ki nongseng ïa ka lawei jong ka jingim’.
Hadien kane u kongsan bad u symbud kongsan kila plie ïa u mawsahnam jong ka jingdap 25 snem ka skul, ka jingpynher ïa ki Baloon da u Rev. C.L. Laloo bad la pyllait ïa ka Souvenir jong ka skul da u Rev. E. Nongpluh.
La pynphuh pynphieng shuh shuh ïa kane ka sngi da ki jingrwai ki jingshad tynrai na ki khynnah skul bad ki jingrwai na ki nonghikai bad kiba pass na kane ka skul. La pynkup burom kumjuh ïa kiba donkti ban pynïaid shakhmat ïa ka skul, ha kaba ka skul kala ïoh ruh ban pynlong ïa shibun ki prokram bapher bapher shi bynta na ka jingrakhe dap 25 snem.
