Katkum ka khubor bala pyllait da i Director ka Sports and Youth Affairs ka sorkar jylla i kong W.A.M. Booth ila pyntip ba ka tnat sport kan sa pynkup burom ia baroh kito ki nongioh Khusnam jong u snem 2017-18 ha ki liang sport bapher bapher.
Ka jingiohkhusnam ka lah ban dei lyngba ki jingiakhun kiba hapoh ka jylla, hapoh ka ri ne wat shabar ri ruh kumjuh (Rigional/Zonal/National & International competition). Ia kane ka jingpynkup burom yn pynlong ha ‘U Soso Tham Auditorium’, Shillong ha ka 27 tarik mynta u bnai ha ka por 12:30 PM.
U Myntri Rangbah ka jylla u Conrad K. Sangma un long u kongsan ha katei ka sngi, ha ka jingiadon ryngkat u bah Banteidor Lyngdoh Myntri ka tnad Sports & Youth Affairs ka sorkar jylla kum u symbud kongsan.