Ka tnad Pule Puthi jong ka Sorkar jylla hapoh ka jingialam jong u Commissioner & Secretary, Vijay Mantri mynta ka sngi ka 27 tarik Nailar 2025 ka la khot ia ka jingialang bad ki nonghikai SSA ha ba iadei bad jingioh NOC na ki Skul shimet ban pyniasoh noh sha ki Skul Sorkar bad kumjuh ia ka jingsiew tulop ba pura jong ki nonghikai SSA bad kiwei kiwei ki mat haba iadei bad ki nonghikai SSA.
Haba kren sha ki lad pathai khubor na ka liang u President ka All Meghalaya SSA School Association hadien ba la wai ka jingialang u la iathuh kumba 298 tylli ki skul ki ban pyniasoh pura noh bad ki Skul Sorkar.
Shuh shuh u la ong haba iadei bad ka jingsiew tulop ia ki nonghikai na ka liang ka tnad pule puthi kan sa phah sha ka tnad finance jong ka sorkar jylla bad kumjuh yn sa rah ha ka kynhun myntri haba iadei bad ka jingsiew pura ia ki tulop jong ki nonghikai SSA.
Nalor kata u la ong ba ia ki skul kiba la kloi ban aiti sha ka sorkar na ka liang ka tnad pule puthi jong ka sorkar jylla kan sa phah sha ka kynhun myntri jong ka sorkar bad yn sa shim rai da ka kynhun myntri haba iadei bad kine ki skul kiba la kloi ban aiti bad pyniaid hi noh da ka Sorkar.
Khatduh u la pyntip kiba bun ki nonghikai SSA ki la leit hikai sha ki skul kiba don bun ki enrollment na ki skul kiba duna Enrollment, bad haba iadei bad ki deficit Skul bad ki adhocskul, ka sorkar kan wanrah lang noh hajuh bad ia ka tulop jong ki nonghikai ka sorkar kan pynpoi beit sha ki Account jong ki Nonghikai la pyntip u bah Aristole C Rymbai, President AMSSASA.
