Namar ka jingbteng ia ka jingiakhih ban shah thngan, khlem buh por naduh ka janmied jong ka 5 Tarik Naiwieng 2024 na ka bynta ban pynurlong ia ka jingdawa ban hiar shuki u Vice Chancellor ka Skulbah NEHU, mynta ka janmiet ka 7 Tarik Naiwieng, ia ki 3 ngut ki samla pule ka Skulbah la hap ban rah noh sha ki jaka sumar namar ka jingshitom.
Ki 3 ngut ki samla ki ba la kem pang, ki kynthup ia u Toniho S. Kharsati uba dei u General Secretary ka NEHUSU, u Organising Secretary jong ka KSU NEHU Unit u Bah Aiboklang Nongsteng bad ka samla Naphisabet Marweiñ.
Haba pyntip halor kane, na ka liang ki nongialam jong ki samla pule ha NEHU, ki la phah da ka kyrwoh ka ba kdew ba wat hapdeng kine ki jingeh, ka long kaba pynduh mynsiem ban ïohi ba u Vice Chancellor u dang ïai bteng ha ka kyrdan jong u, kumba um kwah ban pynbeit ïa ki jingeh bad ki jingdawa ba shisha jong ka seng samla pule. “Ka jingbha jingmiat jong ki nongialam jong ngi ka dei ka jingmih kaba beit na ka jingbym leh ei ei jong ka sorkar kaba mynta, bad ka long kaba donkam eh ba ngin ieng tylli ha kane ka por kaba eh” la ong ka kyrwoh na ki dkhot ki samla pule NEHU.
“Nga kyntu ia baroh ki samla pule ban iatylli bad ban shim ia ka nongrim na ka bynta ka lawei jong ka skulbah jong ngi. Ka koit ka khiah bad ka jingbha jingmiat jong ka imlang sahlang jong ngi ka shong ha ki kam kiba ngi leh mynta. U Vice Chancellor u don ka jingkitkhlieh na ka bynta ki jingeh kiba dang ïaid bad dei ban kitkhlieh ïa ki jinglong jingman kiba nang sniew” . “Ngin iawan lang ban kyrshan ia ki nongialam jong ngi bad dawa ia ka jingkylla na ka bynta ka jingbha jong ka imlang sahlang jong ka skulbah baroh kawei. Na ka bynta ka jaka pule jong ngi bad ka jingbha jong uwei pa uwei u samla pule, ka long kaba kongsan ba u Vice Chancellor un hiar shuki noh” la ong ka kyrwoh.
