Ka District Child Protection Officer, District Child Protection unit, Jowai kala pyntip mynta ka sngi ba ki don ar ngut ki khynnah napoh West Jaintia Hills District kiba la sha jied ban ioh jingmyntoi na ka PM CARES kaba dei ka skhim na ka bynta ki khynnah khunswet kaba la plie pyrda da u Myntri Rangbahduh ka ri India u Narendra Modi.
Kane ka skhim sorkar ka dei na ka bynta ban iarap ia kito ki khunswet kiba la duh noh ia ka kmie bad u kpa na ka daw ka jingkhlad na ka khlam Covid-19. Kane ka skhim kan iarap ban pynbiang ia ki jingdonkam jong kitei ki khunswet naduh ka koit ka khiah, ka pule puthi bad kiwei de ki jingiarap ha ka jingim ba man ka sngi jong ki kat haduh ba kin da kynjoh ia ka rta kaba 23 snem.
Mynta ka sngi kine ki khynnah ryngkat ki nongsumar jong ki kila wan ban iashim bynta ha ka jingialang ha ki kamra bapher bapher ha ophis u Deputy Commissioner, katba u Additional Deputy Commissioner u PK Boro, i District Child Protection Officer, DCPU, Jowai, kong R.D Kynjing, District Informatics Officer, NIC, Jowai kong P. Passah kila iashim bynta lang ha ka jingialang lyngba ki kor ki bor na kamram treikam ka NIC.
Ha kane ka sngi u PK Boro, Additional Deputy Commissioner ula aiti ia ki kot ki sla kiba donkam shah kitei ki khynnah kiba kynthup ia ka shithi na u Myntri Rangbahduh ka ri, ka Sneh Petra (Certificate of PM CARES), ka PM CARE children Passbook bad ka Health card (PM-JAY).
Ha East Jaintia ruh la pynlong ia kane ka prokram ha ophis treikam jong u Deputy Commisioner, ha Khliehriat, ha ka jingiadon ryngkat u DC u A. Baranwal IAS, u bahTeibor Kyndiah, District Child Protection Officer, East Jaintia Hills District, ki dkhot ka Child Welfare Committee, East Jaintia Hills District, ki nongmihkhmat na ka Child Line, East Jaintia Hills District, ki nongmihkhmat na ka District Legal Services Authority, East Jaintia Hills District bad ki nongtrei na ka Superintendent of Child Care Institutions.
Na ka liang u DC ka East Jaintia ula aiti iaki kot ki sla ba donkam sha kitei ki 3 ngut ki khynnah khunswet kiba dei ban ioh ia kane ka jingiarap.
Ia kane ka prokram la iashim bynta ha kiwei de ki District hapoh ka jylla. Baroh kiba la ioh jingmyntoi napoh ka jylla Meghalaya ki don haduh 13 ngut, kata 4 ngut na East Khasi Hills, 3 ngut na East Jaintia Hills, 2 ngut na West Jaintia Hills bad 2 ngut na Ri Bhoi District.
