U Bah Seiborlang Lyngdoh Nonglait Kyrtong shimet na Mawlai konstitwensi ha ka 30 tarik Kyllalyngkot 2025 u la wan thep kyrteng ialade ha ISBT Mawïong ha khmat ka Returning Officers ka Kong D Lyngdoh MCS.
Haba kren sha ki lad pathai khubor hadien ba la dep thep kyrteng na ka liang u Bah Seibor Lyngdoh Nonglait u la ong naduh 14 snem u la ap ban long u nongshakri paidbah bad u la kut jingmut ban ai kti kadiang kti ka mon ban shakri ia u paidbah bad ia ka Jaitbynriew. U la ong naduh 2023 u la pynbna ialade ban ïa aireng na Mawlai konstitwensi kum u Kyrtong shimet. U la leit mih sha ki paidbah ka Mawlai konstitwensi ban pynsngewthuh sha ki paidbah ban ailad ia u ban long uta u nongshakri ia ki paidbah na ka bynta ka Mawlai konstitwensi bad ia ka Jaitbynriew baroh kawei, u la iohi da la ki jong ki khmat ia ki jingeh ki paidbah nongmawlai bad yn ym shet kylla ia ki paidbah Mawlai khnang ba ka Jaitbynriew kan im.
Ngin leit sha KHADC ym ban ia knieh shuki ngin leit ban iada ia ka ri ngin ia weng shwa ia ka jingsngew party ngin leit ban iada ia ka ri bad ka jaitbynriew. Kum ki nongialam dei ban aiti bad len lade ban wanrah ia ka lawei ba phyrnai khnang ban im ki longdien mandien.
Shuh shuh u la ong ngin leit sha KHADC ban pynskhem ia 3 tylli ki mawbyrsiew kaba nyngkong ka riti ka dustur ka dei ban neh junom, kaba ar ka dei ka khyndew ka shyiap ka khlaw ka btap bad kaba lai ka dei ka khaiï pateng bad ban pynkhlaiñ shuh shuh ia ka KHADC ba la don lypa khnang ba ki aiñ jong ka District Council kan long ka stieh jong ka Jaitbynriew Khasi.
“Kum ka jaitbynriew Khasi kam dei ban shu neh tang ka jaitbynriew hynrei ngi dei ban dawa ia ka ktien Khasi ba kan rung hapoh ka khyrnit ba 8 jong ka Riti Synshar jong ka Ri india bad dei ban weng ia ka para 12 AA kaba pyntlot ia ka bor jong ka District Council bad kumjuh ban dawa ia ka ILP kaba dei ka kynroh kaba skhem ia ka Jaitbynriew bad kaba khatduh kum ki nongmihkhmat sha ka KHADC ngi dei ban leh ei ei ia ka Meghalaya Benami Transaction Provision Amendment Act 1985 lada kiba ieid jaitbynriew lada pyntreikam tang ia kine ki aiñ met bad mynsiem ym donkam shuh ban pynbna ieid Jaitbynriew ban trei beit da ka kam” pynkut u Bah Seibor Lyngdoh Nonglait Kyrtong shimet na Mawlai konstitwensi.
