Na ka jinghiar shuki kynsan jong u Bah Shemborlang Rynjah hynnin ka sngi ka 25 Nailur 2025, la pynlong ia ki paidbah Rilum Khasi ba kin buh jingkylli halor ka rai kaba khlem khmih lynti namar tang hadien 7 bnai ba la ioh ban synshar marwei ka Voice of The People’s Party (VPP) ha KHADC, hynnin ka sngi la ioh ia ka khubor kaba la pynkyndit ia ki paidbah watla ka daw u ba Bah Shem u la iathuh ka dei na ka jingshitom ba u la hap ban sumar. Kane ka rai ka la pynklumar bad pynsmiej ia ki paidbah namar ha u bnai Rymphang ba u Prah u la jop don burom, ki la kren tikna ruh ba ka jingsynshar kan long kaba hok bad kaba skhem.
Katkum ka jingpynmih jingpyntip na ka ophis KHADC, la rai ba ka jingjied ia u CEM ba thymmai kan long ha ka 30 tarik mynta u bnai bad la bthah ba ki kyrtong kiba thmu ban aireng ki dei ban pynpoi ia ki kyrteng hashwa ka 11 baje jong ka 29 Nailur ha Ophis KHADC.
Namar ka jingmih noh u Bah Shemborlang na ka EC, ka VPP ka la bujli noh da u Bah Denzil Raynard Chen MDC na Constituency Jaiaw – Mawprem ha katei ka shuki katba ia u Kyrtong CEM la jied ia u Bah Winston Tony Lyngdoh MDC Nongthymmai Constituency.
U Bah Strong Pillar Jana (Chairman KHADC) u la pyntip ba ha ka 30 Nailur ka jingjied kan long da ka Special Session ha kaba baroh ki MDC jong ka KHADC kin don ryngkat kynthup na ka liang pyrshah.
