Ka jingpynkyntang Bishop ia u Phadar Bernard Laloo kan long ha ka sngi u Blei 30 tarik Lber 2025 ha madan Kalbari Cathedral Parish Laitumkhrah Shillong. Ka Mass bakhuid kan Sdang naduh ka por 10:00 baje Mynstep. Ha ka por 1:30 kan don ka jingmane Sakramen bad hadien kata yn don ka program leh burom kaba lyngkot ia u Bishop Thymmai.
Ha kane ka sngi pynkyntang Bishop ia u phadar Bernard Laloo yn don ryngkat u Apostolic Nuncio ne u nongmihkhmat jong u Pope Francis sha Ri India bad Nepal u Most Reverend Leopoldo Girelli bad kin sa don lang ryngkat ki Bishop jong ka North East India na 15 tylli ki Jylla niam ryngkat bad ki Lyngdoh ki riewniam bad ki parabangeit.
Khyndiat shaphang ka jingiaid lynti jong u Phadar Bernard Laloo:
La kha ia u phadar Bernard Laloo ha ka 16.6.1976 ha ka shnong Laitlyngkot, East Khasi Hills bad u dei u khun khatduh jong i Kong Aquila Mai bad i Bah Pius Prel Shabong (Bam kwai ha duwar u Blei).
U la pyndep ia ka BA Honour Political Science ha u Snem 1999. Bachelor of Education ha u Snem 2007. MA Sociology ha u Snem 2009. Post Graduate Diploma in Counseling ha u Snem 2016.
Nalor ki jingpule u la long ruh u nongthaw jingrwai niam ba tbit, u nongthoh kot bad u la pynmih ruh katto katne tylli ki phlim khasi kum u synshar ka Jot bad Hato shano kan ialam.
La pynkyntang Lyngdoh Sohblei ia u ha ka 30 tarik u Iaiong 2006 ha Parish Laitlyngkot. Hadien ka jingpynkyntang Lyngdoh u la trei kum u Lyngdoh ha St Paul Parish Upper Shillong ha u Snem 2006 bad 2007. U la trei kum u Administrator ha Christ King College 2008. Kum u Principal ka Divine Saviour Higher Secondary School, Laitumkhrah ha u Snem 2016. Kum u Director Social Service Centre Shillong naduh u Snem 2017 haduh 2021, kum u Board Member jong ka Caritas India naduh u Snem 2021 haduh 2024. Kum u Parish Priest jong ka Cathedral Parish Laitumkhrah naduh u Snem 2022 haduh mynta bad u Chancellor ka Jylla niambah Shillong.