Ka tnad pulit jong ka West Jaiñtia Hills District Executive Force, mynta ka sngi 21.10.2021, ka la pynlong ia ka jingkynmaw bad leh burom ia ka sngi “Police Commemoration Day” ne ka jingkynmaw burom ia ki Pulit kiba duh ia la ka jingim katba ki dang don hapdeng ka duty. Ia kane ka jingkynmaw burom la pynlong ha Jowai Police Reserve, Administration Building, Jowai.
U Superintendent of Police ka WJHD u Bikram Marak, haba ai jingkren ha ka jingialang kaba lyngkot ha kane ka sngi u la pynkynmaw ba ia kane ka sngi la ju rakhe manla u snem ha kylleng ka Ri, ha ka 21 tarik u bnai Risaw, kum ka dak ban kynmaw burom ia ki para pulit kiba don shisha ia ka mynsiem ban len lade na ka bynta ka kam ba la bynshet ha ki, kat haduh ba ki la kloi wat ban aiti ia la ka jong ka jingim. U SP ula pule iaka kyrteng ki pulit baroh kiba la pha iaka jingim haka jingshakri iaka kam bad aiti iaka jingim naka bynta ka ri. Ki don haduh 377 ngut ki pulit kiba la aiti iaka jingim haka jingshakri iaka ri.
La pynlong ruh ka jingsngap jar kaba ar minit na ka bynta ban kynmaw ïa kitei ki mynsiem ba kordor, ha kaba la don ruh ka jingbuh syntiew ba la shim bynta da u Superintendent of Police ka District kynthup ïa u Shri. B. Chettri, MPS Addtional Superintendent of Police, kong C. W. Lyngdoh, MPS Deputy Superintendent of Police (Crime), bah M.J Marngar Deputy Superintendent of Police (HQ)/(Traffic), West Jaintia Hills, Jowai, ryngkat ka jingiadon lang ki ophisar pulit bad kiwei de ki kynhun pulit.
