Ka lympung ïalehkai 3rd U Adelbert Laloo Memorial Trophy jong ka kyrdan 3rd Division Football Tournament 2023, ba la pynïaid da ka West Jaiñtia District Sports Association (WJDSA) kala poi sha ka jingïakhun Quarter Final kaba la long mynta ka sngi ha madan Kiang Nangbah Stadium, Dongmihsngi Jowai.
Haba phai sha ka jingïakhun ka kynhun ïalehkai jong ka Mukhla Umlangchor kala pynliem da 1-0 kol ïa ka New Hill, ïa katei ka shikol na ka Mukhla Umlangchor la thep da u Rynkat Sumer ha ka minit ba 84.
Ha ka jingïakhun kaba ar ka Moodop Royal kala pynliem da 2-0 kol ïa ka Pateinki Sabah, ïa kitei ki kol na ka Moodop Royal la thep da u Harvestar Dhar ha ka minit ba 53 bad kawei ka kol la kum thep bakla da u Lakhon Shylla (own goal) ha ka minit ba 75.
Katba ha ka jingïakhun kaba lai ka Madan kynsaw Mawkyndeng kala pynliem da 1-0 kol ïa ka Da-i-hi Mynsngat, ïa katei ka shikol kol na ka Madan kynsaw Mawkyndeng la ïoh ban thep da u Danechan I Sayoo ha ka minit ba 63.
La pyntip ba ka Semi Final kan long ha 21 tarik mynta u bnai.
Ki kynhun ban iakhun ki long ka Madan Thadmuthlong pyrshah ia ka Mukhla Umlangshor ki ban iakhun ha ka por 1:00 PM. Katba ka Moodop Royal kan iakhun pyrshah ia ka Madan Kynsaw Mawkyndeng ha ka por 3:00 PM.