3rd Division: Rung phainal ka Newhill. 2nd Division: Jop ka Mukhla Umlangshor

Ka jingïalehkai phutbol Semi Final kaba la long mynta ka sngi 3 tarik u Nailur haka lympung “4^th U Adelbert Laloo Memorial Trophy” jong ka kyrdan 3^rd Division Football Tournament 2024, bala pynïaid daka West Jaiñtia District Sports Association (WJDSA) Jowai ha madan Kiang Nangbah Stadium Dongmihsngi, Jowai.

Haba phai sha ka jingïakhun hapdeng ka Newhill pyrshah ïaka Lumpyrtuh Mihmyntdu kala long kaba ïakhaid bha haduh ba kut ka por da 0-0, kumta la hap ban pynïakhun noh da ka jingïashut Tie Breaker ha kaba ka Newhill kala lah ban pynliem da 4-2 kol ïa ka Lumpyrtuh Mihmyntdu. Lyngba kane ka jingjop jong ka Newhill kala ïoh ban rung sha ka jingïakhun Final.

Katba ha ka “7^th U Debo Shullai Memorial Trophy” jong ka kyrdan 2^nd Division Football Tournament 2024 ka Mukhla Umlangshor kala pynliem da 3-2 kol ïa ka Khliehmynkrem, ïa ki kol na ka Mukhla Umlangshor la thep da u Rio Lyngdoh haka minit ba 18 & 58 bad u Nio Sumer haka minit ba 67. Ïa ki kol na ka Khliehmynkrem la thep da u Mebanker Challam haka minit ba 16 bad u Daman Nongjngi haka minit ba 65.