Lashai ka sngi 19 tarik lai tylli ki jingïakhun ‘Quarter Final‘
Ka lympung ïalehkai 3rd U Adelbert Laloo Memorial Trophy jong ka kyrdan 3rd Division Football Tournament 2023, ba la pynïaid da ka West Jaiñtia District Sports Association (WJDSA) kala poi sha ka jingïakhun ‘Quarter Final’ kaba la long mynta ka sngi ha madan Kiang Nangbah Stadium, Dongmihsngi Jowai.
Haba phai sha ka jingïakhun Quarter Final ba nyngkong ka kynhun ïalehkai jong ka Madan Thadmuthlong kala lah ban pynliem da 4-0 kol ïa ka Mookyrdup, ïa kitei ki kol na ka Madan Thadmuthlong la thep lai kol da u Precious Tang haka minit ba 42, 59 & 74 bad u Manhok Suchiang haka minit ba 45.
Lyngba kane ka jingjop jong ka Madan Thadmuthlong kala buh jaka syndon ha ka Semi Final jong kane ka lympung.
Katba ka jingïakhun ‘Quarter Final’ lashai ka sngi 19 tarik haka por 11 baje mynstep ka Mukhla Umlangchor pyrshah ïa ka Newhill, haka por 1 baje nohphai sngi ka Pateinki Sabah pyrshah ïa ka Moodop Royal bad haka por 3 baje nohphai sngi ka Madan Kynsaw pyrshah ïa ka Da-I-Hi Mynsngat.