Katkum ka khubor kaba la iohlum hadien ka jingwad bniah na ki nongpyniaid jong ka Market Committee jong ka Iawpynsiñ halor ka jingpluh jong ki basa iew hynne ka janmiet la ioh jingtip ba ki don kumba 40 tylli ei ei ki basa kila shah bam duh ha ka ding kaba klang. Kine ki basa iew ki kynthup ia ki basa die wait, die mohkhiew, ki basa die sha, die kpu nalor kiwei de ki basa ba ju shong ki nongdie tiar rit tiar ria.
Katkum ka jingkheiñ kaba la iohlum malu mala ba ka jingduh ha kane ka jingpluh kine ki basa kala kot sha ki lak tyngka bad donbok ba ym don mar satia ha kine ki basa namar ba kam dei ka sngi ba pynlong iew. Na ka liang ki bor pyniaid jong ka Market Committee kin sa lum ia ka jingialang lashai ka sngi na ka bynta ban jurip bniah halor kane ka jingjia pluh ding bad ruh ban lum jingkheiñ kaba bniah ia ka jinglut jingsep baroh.
Ka khubor ka iathuh shuh ba mar sien jia kane ka jingpluh ding ki pulit pynlip ding jong ka Fire & Emergency Service na Jowai kila wan poi ar kali ban tem ia kane ka jingpluh ding.
Ia ka daw ba pynlong ia kane ka jingpluh ding ym pat lah ban ioh da kaba thikna, hynrei kala don ka jingsuba ba ka dei ka jingleh dusmon jong ki katto katne ki riew bymman. Ka jingtohkit na ka liang ki bor jong ka aiñ ka dang iaid shakhmat.
