Haduh 41 ngut ki riew bala heh rta ne kita ki senior Citizen kila ioh jingmyntoi da kaba wan sha ka prokram ai jingsumar bad jurip ei ba la pynlong da ka Jowai City YMCA ha ryngkat ka ophis District Social Welfare Officer, Jowai bad ka tnad ka koit ka khiah jong ka West Jaiñtia Hills District, Jowai hynnin ka sngi 20 tarik u Lber ha ophis treika ka YMCA kaba don ha Iawthymme, Jowai.
Na ka liang ki nongai jingsumar naduh ki Physicians bad ki nongtrei ka koit ka khiah na ka Ladthalaboh Urban Health Centre, Jowai bad na ka Bansara Eye Care Centre, Jowai kila pynlong ïa ka jingjurip bniah (examinations) ïa kitei ki briew.
Ha ka juh ka sngi la pynlong ïa ka prokram ai jinghikai bala pynlong da ki kynhun na Ladthadlaboh kiba la ai jingtip halor ka Non-Communicable Disease (NCD) bad ka kynhun jong ka Bansara Eyes care kila ai jingtip halor kumno ban ïoh jingsumar biang por ha ka bor ïohi jong ki khmat na ka bynta ki briew ba la heh rta.
I Dr. H.L Suting, DEIC Manager, Jowai ila ai jingkren shaphang ka skim Rashtriya Vayoshri Yojana (RVY), da kaba pynsngew ïa ki lad jingmyntoi kiba lah ban ïoh da ki briew ba la heh rta bad kiwei de ki lad jingïarap hapoh kane ka skim.
