Namar ka jingialeh pyrshah ia ka party voice of the people’s party (VPP) lane ka party ia kaba la paw bha da ka kyrteng ‘Prah’, u MLA jong ka North Shillong Constituency Bah Adelbert Nongrum, u la shah sospon haduh 3 snem kynthih ha ka seng, kata ia kaba yn treikam naduh une u bnai Lber 2025.
Lah ban pynkynmaw hangne ba ka daw hi ban poi haduh une u pud kadei na ka jingbym hun jong u Bah Adelbert ia ka rai jong ka seng ban jied ia ki kyrtong MDC ha kane ka Elekshon ba dang shu dep shen. Na katei ka jingioh daw, u Bah Nongrum u la pynpaw ia ka jingkhluit bad sdang ruh ban ïaleh pyrshah, kata ban kiar ruh na kaba ïatreilang, kynthup ha ka jingleit ialap Elekshon MDC 2025.
Katkum ka shithi ba la kdew ha ka shithi sospon na ka bynta u Bah Adelbert, la ong ba ka seng ka la pan ia ka jingpynshai halor ka jingialeh pyrshah jong u bad ha ka jubab ba u la ai ha ka 1 tarik Lber 2025, ka seng kam hun satia namar ka dei ka jubab kaba pynksan ia la ki jingleh jong u bad ym ban pdiang ia ki jingbakla.
Kumta, na katei ka jingjied bad ka mon sngewbha jong u, ka seng ka la rai ban sospen ia une u MLA bad ai ruh ia ki jingbthah bad ki jingkdew kiba long kumne – “Ym shah ban bat ia kano kano ka kam ha ka party ha kine ki 3 snem, um don hok ban dang long u Dkhot jong ka party, ym lah ruh ban mihkhmat ia ka party ha kano kano ka rynsan paidbah kynthup ha ki jingleit ialap Elekshon, la maham ruh ba um dei ban leh ia kano kano ka kam ka ban ktah ia ka kyrteng jong ka party”.
Ha katei ka shithi la bsut ruh ia ki kyrteng jong ki nongbud u Bah Adelbert kiba la shah sospon lang, kynthup ia u Bah Snarbor Laloo, Bah Imti Jamir, Bah Wilstone Sohshang, Bah Richinnusiness Marwein.
Dang shen ha shwa ka Elekshon, ki paidbah nongkyrshan u Prah ki la bitar ia ka jingleh u Bah Adelbert bad angnud ruh ba kane ka jingleh kan ym ktah lane pynpait ia ka party namar ka dei ka seng kaba la ioh ia ka jingshaniah, hynrei kane ka jingjia ka la don ia ka jingtikna ba u Prah u la sdang pait bad ym slem shuh ba u Bah Adelbert ruh un mih na kane ka seng.
Ia katei ka shithi, u Bah Ardent Miller Basaiawmoit uba dei ruh u President ka seng, u khlem pynpaw kyrteng ialade hynrei la soi ia katei ka shithi da u Bah Kara H. Shen Vice President VPP.